ҚМДБ Ақтөбе мешітінде бойжеткенге тиіскен ер адамға қатысты мәлімдеме жасады

Қазақстан мұсылмандары діни басқармасы Ақтөбеде болған оқиғаға қатысты пікір білдірді — ер адам мешіттердің бірінің аумағында бойжеткенге тиіскен, деп хабарлайды KAZ.NUR.KZ.

Еске салайық, 25 шілдеде Ақтөбе қаласындағы "Нұр Ғасыр" мешітінен шығатын жерде белгісіз ер адам келуші қыздың жолын бөгеп, әдепсіз астары бар сөздер айтқан. Бұл оқиғаның видеосы әлеуметтік желіде жарияланған.

Кейін ер адамның үстінен әкімшілік хаттама толтырылып, іс сотқа жолданатын болды.

Бүгін Қазақстан мұсылмандары діни басқармасы бұл жайтқа қатысты мәлімдеме жасап, мешітке келген әрбір азамат өзін әдеппен, ізетпен ұстауға міндетті еске салды.

"Әлеуметтік желілер мен ақпарат құралдарында Ақтөбе қаласындағы мешіт ауласында болған оқиғаға қатысты түрлі пікірлер таралып жатыр.

Мешіт – құлшылық пен тәрбие ордасы. Онда келген әрбір азамат өзін әдеппен, ізетпен ұстауға міндетті. Ислам шариғатында өзгеге тіл тигізу, орынсыз сөз айту, әсіресе әйел затына қолайсыз пікір білдіру – мұсылман әдебіне сай келмейтін және айыпталатын іс-әрекет.

Қазақстан мұсылмандары діни басқармасы Ақтөбедегі оқиғада қыз балаға орынсыз сөз айтқан азаматтың әрекетін айыптайды. Өйткені мұндай әрекет мұсылмандыққа жат, әрі адамгершілік қағидаттарына да сай емес.

ҚМДБ жамағатты сабыр мен парасаттылыққа шақырып, жалған ақпарат пен арандатушылық әрекеттерге ермеуге үндейді. Қоғамда бейбітшілік пен өзара құрмет мәдениетін қалыптастыру – баршамыздың ортақ жауапкершілігіміз", - делінген ҚМДБ хабарламасында.

Мәтіннен қате тапсаңыз, бізге жазыңыз