Былтыр сәуірде құрылған World Boxing ұйымына мүше федерациялар саны 51-ге жетті. Бұл туралы KAZ.NUR.KZ ұйымның ресми сайтына сілтеме жасап хабарлайды.
World Boxing ұйымына тағы 7 елдің бокс федерациясы қосылды. Олар Қырғызстан, Андорра, Бельгия, Ирак, Литва, Мадагаскар және Таиланд. Енді ұйым құрамында 51 федерация бар.
World Boxing президенті Борис ван дер Варттың айтуынша, ұйымға 50-ден аса федерация қосылуының әлемдік бокс үшін үлкен маңызы бар.
"Бұл өзгеріске деген ұмтылыстың және көптеген ұлттық федерациялар бокс Олимпиада ойындарының бір бөлігі болып қала беруі керек екенін мойындайтынының дәлелі", - деді ол.
Айта кетейік, боксты Олимпиада бағдарламасында қалдыруды көздейтін World Boxing ұйымы 2023 жылдың сәуірінде құрылған. Биыл қыркүйекте Қазақстан бокс федерациясы ұйымның қатарына қосылу үшін ресми өтініш берген еді.
Сондай-ақ Қазақстан ҰОК президенті Геннадий Головкин World Boxing жаңа Олимпиадалық комиссиясының төрағасы атанды. Оның басты міндеттерінің бірі – боксты Олимпиада ойындарының бағдарламасында қалдырып, World Boxing ұйымын ХОК мойындауы үшін Халықаралық Олимпиада комитетімен тығыз әріптестік орнату.
Мақаланың түпнұсқасы: https://kaz.nur.kz/sport/boxing/2181218-qyrgyzstan-zhane-tagy-6-el-world-boxing-uiymyna-mushe-boldy/
