Cанжарәлі Бегалиев бокстан әлем чемпионатында алтын медаль жеңіп алды

Қазақстандық боксшы Cанжарәлі Бегалиев Будвада (Черногория) өтіп жатқан жастар арасындағы әлем чемпионатында алтын жүлде еншіледі. Бұл туралы KAZ.NUR.KZ хабарлайды.

Cанжарәлі Бегалиев 75 кг салмақ дәрежесіндегі финалда өзбек боксшысы Джафарбек Шахбазовпен қолғап түйістірді. Бұл жекпе-жекте қазақстандық спортшы қарсыласын айқын басымдықпен жеңді (5:0). Санжарәліге алтын жүлде үшін ұйымдастырушылар тарапынан 8000 доллар (3,9 млн теңге) сыйақы беріледі.

Бегалиев әлем чемпионатындағы алғашқы жекпе-жегінде румыниялық Шуч Иштван Лайошты жеңсе, кейін Болгария боксшысы Хашем Халилден басым түскен еді. Ал ширек финалда кубалық қарсыласы Эбдрю Ардилесті, жартылай финалда польшалық Фабиан Урбанскиді ұтты.

Санжарәлі Бегалиев 2022 жылы жасөспірімдер арасындағы Азия чемпионатында алтын медаль жеңіп алса, 2024 жылы жастар арасындағы құрлық додасында топ жарған болатын.

Осыған дейін Төрехан Сабырхан Будва бәсекесінде кубалық боксшыны жеңіп, әлем чемпионы атанды. Қазір Қазақстан қоржынында 10 қола және 2 алтын жүлде бар.

Мәтіннен қате тапсаңыз, бізге жазыңыз