Бас бапкерліктен кеткен Қайрат Сәтжанов жаңа қызметке тағайындалды

Бокстан Қазақстан ерлер құрамасының бұрынғы бас бапкері Қайрат Сәтжанов жаңа қызметке тағайындалды, деп хабарлайды еліміздің бокс федерациясына сілтеме жасаған KAZ.NUR.KZ.

"Қазақстан бокс федерациясы президентінің бұйрығымен Қайрат Сәтжанов ҚБФ жаттықтырушылармен жұмыс жөніндегі вице-президенті қызметіне тағайындалды.

Қайрат Тұрсынханұлы жаттықтырушылар жұмысын үйлестіріп, дайындық жоспарына жұмыс істейді", - делінген хабарламада.

Естеріңізге сала кетейік, бұған дейін Қайрат Сәтжановтың денсаулығына байланысты бокстан ерлер құрамасының бас бапкері қызметінен кеткені белгілі болған еді.

Қайрат Тұрсынханұлы 2024 жылғы тамыздан бастап бас бапкер қызметін атқарды.

Оның орнына ерлер командасының бас бапкері болып Нұржан Насанов тағайындалды.

Бүгін Астанада бокс федерациясы Қайрат Сәтжановқа құрмет көрсетіп, Toyota Land Cruiser 300 автокөлігін және Астана қаласынан 3 бөлмелі пәтер кілтін табыстады.

Мәтіннен қате тапсаңыз, бізге жазыңыз