Дзюдошы Әбиба Әбужақынова Grand Slam турнирінің күміс жүлдегері атанды

Ташкентта өтіп жатқан дзюдодан Grand Slam жарысында қазақстандық дзюдошы Әбиба Әбужақынова күміс жүлде еншіледі. Бұл туралы KAZ.NUR.KZ тілшісі хабарлайды.

48 келіде белдесетін Әбиба Әбужақынова финалда Ресей атынан сынға түскен нейтралды спортшы Сабина Гилиязовамен кездесіп, жеңіліп қалды. Осылайша қазақстандық дзюдошы жарыстың күміс жүлдесін місе тұтты.

Айта кетейік, Әбиба жартылай финалда швециялық дзюдошы Тара Бабулфатты жеңді. Осылайша Бакуде кеткен есесін қайтарған еді.

Қазақстандық дзюдошы жыл басталғалы бері қатысқан жарыстарының бәрінде жүлде алып келеді. Ол Португалияның Одивелаш қаласында өткен дзюдодан әлемдік Гран-при турнирінде қола медаль иеленді. Кейін Бакуде (Әзербайжан) өткен әлемдік Grand Slam жарысында тағы да қола жүлде еншіледі.

Еске салайық, Елдос Сметов Ташкентте өтіп жатқан жарыстан шеттетілгенін жазғанбыз. Бас бапкер Нұрбол Сүлейменовтің айтуынша, ол қарсыласына тыйым салынған әдісті қолданғандықтан жұбаныш белдесуіне қатыса алмайды.

Мәтіннен қате тапсаңыз, бізге жазыңыз