Азия чемпионатының финалында Ризабек Айтмұханды жеңген балуан мәлімдеме жасады

Күрестен Азия чемпионатының финалында қазақстандық еркін күрес шебері Ризабек Айтмұханды жеңген Бахрейн өкілі Ахмет Тажудинов мәлімдеме жасады. Бұл туралы KAZ.NUR.KZ тілшісі хабарлайды.

Кеше, 11 сәуірде Бішкекте өтіп жатқан Азия чемпионатының финалында Ризабек Айтмұхан мен Ахмет Тажудинов кездескен еді. Бұл бәсекеде Тажудинов 4:2 есебімен жеңді.

"Мен екінші мәрте Азия чемпионы болдым. Өткен жылдың сәуірінен бері Жаратушы маған қатарынан алтыншы рет жеңіс тұғырына көтерілуге күш беріп жатыр. Әр сәт сайын әлемнің түрлі мемлекетінен жанкүйерлерім қолдап жатқанын сеземін. Бұл маған мотивация береді. Әрқайсыңызға қолдауларыңыз үшін алғыс айтамын. Мен сіздерді Париждегі Олимпиада ойындарында алтын жүлде алып қуантуға тырысамын. Енді жарақаттарымды емдеп, жаттықтырушыларыммен және командадағы бауырларыммен дайындықтың соңғы кезеңінен өту ғана қалды", - деп жазды Ахмет Тажудинов Instagram-дағы парақшасында.

Еске салайық, Ризабек Айтмұхан финалдағы жеңілісі туралы айтқан еді.

Мәтіннен қате тапсаңыз, бізге жазыңыз