Қазақстандық дзюдошы Мағжан Шамшадин Душанбеде (Тәжікстан) өтіп жатқан Grand Slam турнирінде күміс медаль иеленді. Бұл туралы KAZ.NUR.KZ тілшісі хабарлайды.
60 кг салмақтағы Мағжан Шамшадин жарыстың финалында Тәжікстан өкілі Мұхаммедсалех Куватовпен кездесті. Бұл бәсекеде тәжікстандық дзюдошы "иппон" әдісімен жеңіп кетті.
Айта кетейік, Мағжан турнирдегі алғашқы белдесуінде Мұхаммад Махмадизоданы (Тәжікстан) ұтты. Кейін ширек финалда италиялық Анджело Пантаномен кездесіп, "иппон" ұпайымен жеңіске жетті. Ал жартылай финалда ресейлік Изнаур Сааевтан қосымша уақытта басым түсіп, ақтық бәсекеге өткен еді.
Мағжан Шамшадин өткен жылдың соңында жарақатына байланысты қатардан шығып қалған болатын. Ол жақында жарақатынан айығып, ұлттық құрама сапына қосылды.
Енді Мағжан 10-12 мамыр аралығында Астанада өтетін дзюдодан әлемдік Grand Slam турниріне қатысады. Бұл жарыста дзюдошылар биыл Парижде өтетін Жазғы Олимпиада ойындарына жолдама алу үшін ұпай жинайды.
Мақаланың түпнұсқасы: https://kaz.nur.kz/sport/fight/2095514-qazaqstandyq-dziudoshy-grand-slam-turnirining-kumis-zhuldegeri-atandy/
