Елдос Сметов елордада өтіп жатқан Grand Slam жарысында қола жүлде еншіледі

Қазақстандық дзюдошы Елдос Сметов Астанада өтіп жатқан Qazaqstan Barysy Grand Slam турнирінің қола жүлдегері атанды. Бұл туралы KAZ.NUR.KZ тілшісі хабарлайды.

60 кг салмақта бақ сынаған қазақстандық дзюдошы қола жүлде үшін таласта Әзербайжан өкілі Ахмад Юсифовты жеңді.

Сметов алғашқы айналымда португалиялық Родриго Коста Лопеспен кездесіп, "иппон" әдісімен ұтқан еді. Кейін 1/8 финалда марокколық Юнесс Саддикиден басым түсті. Ал ширек финалда ресейлік Рамазан Абдуллаевтан қосымша уақытта есе жіберіп, жұбаныш белдесуінде түркменстандық Айбек Өміровты "иппон" ұпайымен жеңген болатын.

Ал бүгін, 10 мамырда боз кілемге шыққан Қазақстан ерлер құрамасының өзге мүшелері толығымен жеңіліс тапты. 

Айта кетейік, осыған дейін Ғалия Тынбаева қазақ қыздары арасында тұңғыш рет Grand Slam турнирінің чемпионы атанғанын жазғанбыз.

Мәтіннен қате тапсаңыз, бізге жазыңыз