Қазақстан еркін күрестен Гран-при турнирінде екі алтын медаль жеңіп алды

Қазақстандық еркін күрес шеберлері Гүлдана Бекеш пен Эльмира Сыздықова Францияның Ницца қаласында өткен Анри Деглан Гран-при турнирінде алтын медаль жеңіп алды. Бұл туралы KAZ.NUR.KZ Ұлттық Олимпиада комитетіне сілтеме жасап хабарлайды.

Гран-при турнирінде Гүлдана Бекеш 59 келіге дейінгі салмақ дәрежесінде жеңімпаз атанса, Эльмира Сыздықова 76 келіге дейінгі салмақта алтын медаль иеленген.

"Бұл турнир спортшылар үшін жаңа маусымдағы алғашқы жарыс", - деп жазады olympic.kz сайты.

Айта кетейік, былтыр Гүлдана Бекеш жастар арасында Азия чемпионатында қола медаль еншілесе, Эльмира Сыздықова 2024 жылы ересектер арасында құрлық біріншілігінің қола жүлдегері атанған еді.

Естеріңізге сала кетсек, бұған дейін Қазақстан жасөспірімдер құрамасы шпагамен семсерлесуден Бахрейннің Манама қаласында өткен Әлем кубогы кезеңінде алтын медаль жеңіп алғанын жазған едік.

Мәтіннен қате тапсаңыз, бізге жазыңыз