Футболдан Қазақстан құрамасының бұрынғы ойыншысы Ұлан Қонысбаев аралас жекпе-жек спортшысы Қуат Хамитовтың желідегі пікіріне қатысты ойын айтты. Ол күні кеше Финляндияны жеңген ұлттық құраманы сынға алған, деп жазады KAZ.NUR.KZ.
Қонысбаев Meta-ratings.kz тілшісіне берген сұхбаты кезінде ұлттық құраманың ойынына қатысты пікір білдірді.
Бұрынғы футболшы Қуат Хамитовтың пікіріне мән бермеуге шақырды.
"Ондай адамдарға мән берудің қажеті жоқ. Олар айтып-айтып қояды. Ал біздің Еуропа чемпионатына шығуға тамаша мүмкіндігіміз бар. Егер Дания Словенияны жеңіп, біз Сан-Марино мен Словениядан басым түссек, Қазақстанда той болады. Тіпті шыға алмасақ та, жанкүйерлердің құрама ойынына көңілі толатын секілді. Өтіп жатсақ, қанекей. Еуропаны біраз шулатушы едік, – деді Қонысбаев.
Айта кетейік, аралас жекпе-жек жұлдызы Қуат Хамитов күні кеше сырт алаңда жеңіске жеткен Қазақстан футбол құрамасын сынға алған еді.
Мақаланың түпнұсқасы: https://kaz.nur.kz/sport/football/2041590-man-berudin-qazeti-zoq-ulan-qonysbaev-quat-xamitovtyn-synyna-zauap-berdi/
