The Best FIFA Footbal Awards "2023 жылдың үздік футболшысы" атағына дауыс беру нәтижесін жариялады. Бұл туралы KAZ.NUR.KZ fifa.com порталына сілтеме жасап хабарлайды.
Қазақстан ұлттық құрамасының капитаны және "Ордабасы" клубының футболшысы Асхат Тағыбергеннің ойынша, жылдың ең үздік футболшысы – 2022 жылғы Әлем чемпионатының финалисі, франциялық шабуылшы Килиан Мбаппе. Екінші орында "Алтын доп" жүлдесінің 8 дүркін иегері Лионель Месси болса, Асхаттың үздік үштігін "Әл-Наср" командасының футболшысы Марцело Брозович аяқтайды.
Ұлттық құраманың бас бапкері Магомед Адиев Лионель Мессиді "ең үздік футболшы" деп таныды. Бапкер тізімінің екінші орнында "Манчестер Сити" клубының жартылай қорғаушысы Кевин де Брюйне болса, үшінші орында Килиан Мбаппе.
Естеріңізге сала кетейік, жалпы дауыс беру нәтижесі бойынша, Лионель Месси – "2023 жылдың ең үздік футболшысы" деп танылды.
Мақаланың түпнұсқасы: https://kaz.nur.kz/sport/football/2055736-mbappe-zane-marcelo-brozovic-asxat-tagybergen-men-magomed-adiev-fifa-the-best-2023-nominaciyasynda-kimge-dauys-berdi/
