Сауд Арабиялық "Әл-Наср" мен америкалық "Интер Майами" футбол клубтары арасындағы жолдастық кездесуде ерекше гол салынды. Бұл туралы KAZ.NUR.KZ тілшісі хабарлайды.
Ойынның 12-минутында "Әл-Наср" клубының қорғаушысы Эмерик Лапорт өз алаңынан айып добын теуіп, қарсылас қақпасына дәл соққы бағыттады. Осылайша есепті 3:0-ге жеткізді.
Айта кетейік, Эмерик Лапорт осыған дейін "Манчестер Сити" футбол клубында ойнаған. Ол "Әл-Насрға" өткен жылдың тамыз айында қосылды.
Еске салайық, "Әл-Наср" футбол клубы америкалық "Интер Майамиді" 6:0 есебімен жеңген еді. Бұл матчқа Роналду жарақатына байланысты қатыспады. Ал Месси қосалқы құрамда қалып, алаңға тек 83 минутта шықты. Десе де "Интер Майами" сапында Мессидің "Барселона" клубындағы бұрынғы әріптестері Луис Суарес, Бускетс және Жорди Альба өнер көрсетті.
Қазір футболдан Сауд Арабия чемпионатының турнир кестесінде "Әл-Наср" 46 ұпаймен 2-орында тұр.
Мақаланың түпнұсқасы: https://kaz.nur.kz/sport/football/2058822-ispaniya-ulttyq-quramasynyn-qorgausysy-70-metr-qasyqtyqtan-gol-soqty-video/
