"Семей" футзал клубын тарихи жетістікке жеткізген бас бапкер қызметінен босатылды

"Семей" футзал клубы бас бапкер Дави Мендонсамен ынтымақтастықты аяқтады. Бұл туралы KAZ.NUR.KZ клубтың Instagram-дағы парақшасына сілтеме жасап хабарлайды.

Дави Мендонсаның басшылығымен "Семей" командаcы 2023/24 жылғы маусымда өз тарихында алғаш рет Қазақстан чемпионы атанған еді.

"Біз Давиге команданың дамуына қосқан үлесі үшін шын жүректен алғыс айтамыз. Оның қызметінде клуб айтарлықтай жетістіктерге жетіп, Еуропаның 16 үздік командасының біріне айналды. Дегенмен, қазіргі футзал үнемі даму мен бейімделуді қажет етеді. Клуб басшылығы командаға Қазақстан чемпионатында да, халықаралық аренада да бәсекеге қабілетті болып қалу үшін жаңа тәсілдер қажет деген қорытындыға келді", - делінген клуб хабарламасында.

Жаңа бас бапкер тағайындалғанша бас бапкердің міндетін "Семей" ФК спорт директоры Аслан Смаков атқаратын болды.

Еске салайық, футзалдан Қазақстан ерлер құрамасы Futsal Planet нұсқасы бойынша әлемнің үздік командасы атағына үміткерлер тізіміне енген еді.

Мәтіннен қате тапсаңыз, бізге жазыңыз