Футболдан ӘЧ-2026: ширек финалдың барлық жұбы белгілі болды

Футболдан 2026 жылғы әлем чемпионатының 1/8 финалдық ойындары аяқталды. Сегіз ұлттық құрама плей-оффтың келесі кезеңіне жолдама алды, деп хабарлайды KAZ.NUR.KZ.

Футболдан әлем біріншілігі үш елде – АҚШ, Канада және Мексикада өтіп жатыр. Турнир қожайындары саналатын барлық команда 1/8 финалда жарыс жолынан шығып қалды. Ширек финалға сегіз ұлттық құрама шықты, оның ішінде қазіргі чемпион – Аргентина да бар.

Келесі кезең ойындары Қазақстан уақыты бойынша 10-12 шілде аралығында өтеді. Ширек финал жұптары төмендегідей:

• Франция - Марокко
• Испания - Бельгия
• Норвегия - Англия
• Аргентина - Швейцария

Осылайша, басты титул үшін күресті Еуропадан (UEFA) алты құрама, Африка (CAF) мен Оңтүстік Америкадан (CONMEBOL) бір-бір команда жалғастырады.

Футболдан әлем чемпионаты 19 шілдеге дейін жалғасады.

Мәтіннен қате тапсаңыз, бізге жазыңыз