Қазақстандық хоккейшілер әлем чемпионатының элиталық дивизионындағы орнын сақтай алмады

Қазақстан құрамасы Финляндияда өтіп жатқан шайбалы хоккейден жасөспірімдер арасындағы әлем чемпионатының элиталық дивизионындағы орнын сақтап қалу үшін матч өткізді. Бұл туралы KAZ.NUR.KZ тілшісі хабарлайды.

B тобындағы Қазақстан құрамасы элиталық дивизиондағы орнын сақтау үшін А тобында көш соңында тұрған Норвегияға қарсы ойнады. Матчтың негізгі уақыты 5:5 есебімен тең аяқталды. Овертаймда жеңімпаз анықталған жоқ. Ал ойыннан кейінгі буллитте норвегиялықтар басым түсті (3:2).

Айта кетейік, Қазақстан құрамасы топтық кезеңде төрт матч өткізді. Оның тек біреуінде жеңіске жетіп, үшеуінде ұтылды. Отандастарымыз Чехия командасынан овертаймда 4:3 есебімен басым түсіп, тарихи жетістікке жеткен еді. Бірақ Швейцария (1:5), Швеция (1:7) және Канада (3:11) құрамаларынан ұтылып қалды.

Енді келесі жылы хоккейден Қазақстан жастар құрамасы IA дивизионында ойнайды.

Мәтіннен қате тапсаңыз, бізге жазыңыз