Ресейлік спортшы Александр Грозин өзін жекпе-жекке шақырған қазақстандық файтер Қуат Хамитовке жауап берді. Бұл туралы KAZ.NUR.KZ тілшісі Грозиннің Instagram-дағы парақшасына сілтеме жасап хабарлайды.
"Наше дело 81" турнирінде қазақстандық жекпе-жек шебері Мұратбек Қасымбай (лақап аты – "Қазақ терминаторы") ресейлік файтер Александр Грозинмен кездескен еді. Бұл кездесуде төрешілер жеңісті ресейлікке берді.
Осыдан кейін қазақстандық файтер Қуат Хамитов Грозинды жекпе-жекке шақырды.
"Наше дело", маған Грозинның әрдайым біздің файтерлерді жеңіп кете беретіні ұнамайды. Сондықтан оған диваннан тұрып, менімен күш сынасу керек. Бұл жағдайды түзету керек. Александр Грозин, соңғы сөз өзіңде. Шақыртуды қабылда, көрейік, кім мықты екенін", - деді Қуат Хамитов Instagram stories-те жариялаған видеода.
Грозин бұл шақыруды жауапсыз қалдырмады.
"Наше дело", сәлем! Ана жақта бір шал маған үндеу тастап жатыр. Оның есімі – Қуат Хамитов. Ол диваннан тұрып, менімен жекпе-жекке шыққысы келеді. Егер лига мен көрермендер қызығушылық танытса, мен оны дәл сол диванға қуана қайта жатқызамын. Сондықтан Қуат, дайындал, жақында кездесеміз", - деді ол Instagram stories-те жариялаған видеода.
Мақаланың түпнұсқасы: https://kaz.nur.kz/sport/mma/2053230-daiyndal-grozin-ozin-zekpe-zekke-saqyrgan-quat-xamitovke-zauap-berdi/
