Қазақстандық аралас жекпе-жек шебері Жалғас Жұмағұлов Naiza 57 турниріндегі жеңісінен кейін мәлімдеме жасады. Бұл туралы KAZ.NUR.KZ Жалғас Жұмағұловтың Instagram-дағы ресми парақшасына сілтеме жасап хабарлайды.
35 жастағы қазақстандық файтер Алматыда өткен Naiza 57 турнирінің басты жекпе-жегінде АҚШ өкілі Кливленд Маклинпен кездескен еді. Жалғас Жұмағұлов жекпе-жек барысында аяғын сындырып алғанына қарамастан белгіленген уақыт аяқталғанша өнер көрсетіп, төрешілердің шешімімен жеңіске жетті.
"Ал, достар, тағы бір турнирді өткіздік. Біреулер таста десе, енді біреулер күш жігерің бар дейді, бірақ мен бәрін тыңдасам бұрынғыдай бір орында тұрып, армандарым тек басымда ойымда қалар еді.
Бұл жекпе-жек барлығы басымызда, яғни түпсанамызда, ауырсыну уақытша екенін және соңғы нүкте маңыздырақ екенін көрсетті! Кез келген салада жолын бастайтындарға үлгі болғым келеді. Оңай болмайды, бірақ қиындықтар арқылы нәтижесі тәтті болады! Ешкімді тыңдама, көп адамдар бар, сонымен қатар олардың пікірлері, ойлау деңгейінен аса алмайтын қаңқа болмайды дейтіндердің санасында. Маған ешнәрсе оңайлықпен келген жоқ, қазір Алланың қалауымен тынымсыз еңбегім мен қажырлы еңбегімнің жемісін көріп жатырмын! Сондай-ақ бұл жекпе-жекте мен өз күресімді, жүзеге асыра алғанымды және көрсете алғанымды атап өткім келді", – деп жазды Жалғас Жұмағұлов.
Сондай-ақ қолдап жатқан адамдарға алғыс айтып, жарақатынан айыққан соң оралатынын жеткізді.
"Рахмет жанымда жүрген, уайымдап жүрген барша халқыма! Барлық тілектер мен уайымдарды көріп, кейбіреулеріне жауап беруге тырысып, кейбіреулеріне жауап беруге үлгермей, бірақ сіздердің қолдауларыңызды көріп, алғысымды білдіремін. Менде барлығы жақсы Альхамдулиллях! Жақында сауығып, әрекетке қайта ораламын ИншАлла! Тағы да барлығына үлкен рахмет!", – деп жазды қазақстандық файтер.
Мақаланың түпнұсқасы: https://kaz.nur.kz/sport/mma/2063403-auyrsynu-uaqytsa-zalgas-zumagulov-zaraqatyna-qatysty-malimdeme-zasady/
