Қазақстандық аралас жекпе-жек шебері Шавкат Рахмонов UFC-дегі үздік файтерлердің бірі Джек Делла Маддаленаның үндеуіне жауап берді. Бұл туралы KAZ.NUR.KZ тілшісі хабарлайды.
Джек Делла Маддалена Майамиде (АҚШ, Флорида штаты) өткен UFC 299 турнирінде бразилиялық файтер Гилберт Бернсті нокаутпен жеңген еді. Осы жеңісінен кейін Маддалена октагонда тұрып Шавкат Рахмоновты жекпе-жекке шақырды.
"Бұл дивизионда мықтылар көп, бірақ мен бәрінен мықтымын. Шавкат Рахмонов, сен үздіктердің бірісің. Екеуіміз жекпе-жек өткізе аламыз. Кеттік", – деді ол.
Шавкат Рахмонов бұл шақыруға X желісіндегі ресми парақшасында жауап берді.
"Мен сенің батылдығың мен сенімділігіңді құрметтеймін, Джек. Бірақ сені менің осы уақытқа дейінгі қарсыластарым бастан кешкен тағдыр күтіп тұр", – деп жазды Рахмонов.
Еске салайық, Шавкат Рахмоновтың қарындасы UFC-ден ұсыныс келіп түскенін айтқан еді.
Мақаланың түпнұсқасы: https://kaz.nur.kz/sport/mma/2065938-savkat-raxmonov-zekpe-zekke-saqyrgan-ufc-din-zana-zuldyzyna-zauap-berdi/
