Қазақстандық аралас жекпе-жек шебері Шавкат Рахмонов UFC-дегі келесі қарсыласын таңдады. Бұл туралы KAZ.NUR.KZ тілшісі хабарлайды.
"Джек Делла Маддалена жарақат алып қалды, Усман мен Колби жекпе-жекке шыққысы келмейді. Сол себепті Леон мен Белал арасындағы кездесуде жеңгенімен жұдырықтасуға дайынмын", - деп жазды Рахмонов X желісіндегі парақшасында.
Айта кетейік, 27 шілдеде UFC-дің жартылай орта салмақтағы қазіргі чемпионы британиялық Леон Эдвардс америкалық файтер Белал Мухаммадпен титулдық жекпе-жекке шығады. Бұл кездесу Манчестердегі (Англия) UFC 304 турнирінде өтеді.
Шавкат Рахмонов соңғы жекпе-жегін 2023 жылы желтоқсанда Лас-Вегас (АҚШ) қаласында өткізіп, америкалық файтер Стивен Томпсонды екінші раундта мерзімінен бұрын жеңген болатын. Осылайша, MMA спортындағы 18-жеңісіне қол жеткізді. Қазір қазақстандық файтер жартылай орта салмақтағы UFC рейтингінде үшінші орында тұр.
Мақаланың түпнұсқасы: https://kaz.nur.kz/sport/mma/2114745-shavkat-rahmonov-ufc-degi-kelesi-qarsylasyn-tangdady/
