"Денсаулығы сыр берді": Шавкат Рахмоновтың бапкері спортшының жекпе-жек алдындағы жағдайы туралы айтты

Жеңіліп көрмеген қазақстандық файтер Шавкат Рахмоновтың бапкері Эдуард Базров Youtube-тегі Naiza TV арнасына берген сұқбатында шәкіртінің жекпе-жек алдындағы денсаулығы туралы айтты. Бұл туралы KAZ.NUR.KZ хабарлайды.

Шавкат Рахмонов 8 желтоқсанда UFC 310 турнирінде ирландиялық Иэн Гэрримен күш сынасып, төрешілердің шешімімен жеңіске жеткен еді. Қазақстандық файтердің бапкері Эдуард Базров жекпе-жек алдында Рахмоновтың жағдайы қандай болғанын айтты.

"Осы жекпе-жек алдында Шавкаттың денсаулығы сыр берді. Біз бұл туралы ештеңе айтқан жоқпыз, жоспарланған жекпе-жекке шықтық. Мұндай жағдайда кез келген UFC жауынгері жекпе-жектен бас тартар еді. Мен тарқатып айтпаймын, бірақ Шавкаттың денсаулығында шынымен де үлкен мәселелер болды", - деді Базров.

Айта кетейік, Шавкат Рахмонов UFC 310 турнирінде аралас жекпе-жектегі мансабында 19, ал UFC-де 7-рет жеңіске жетті. Сондай-ақ ол қарсыласын алғаш рет мерзімінен бұрын емес, төрешілердің шешімімен жеңді.

Осыған дейін Иэн Гэрри желіде Шавкат Рахмоновқа қазақ тілінде үндеу жариялаған еді. Ол қарсыласына құрмет танытып, жеңісімен құттықтады.

Мәтіннен қате тапсаңыз, бізге жазыңыз