Қазақстандық аралас жекпе-жек шебері Дияр Нұрғожай UFC-дегі алғашқы жекпе-жегін кімге қарсы өткізетіні белгілі болды. Бұл туралы KAZ.NUR.KZ cпортшының командасының Instagram-дағы парақшасына сілтеме жасап хабарлайды.
Дияр Нұрғожай 15 наурызда UFC-де дебют жасайды. Ол Лас-Вегаста өтетін UFC Vegas 104 турнирінде 28 жастағы бразилиялық Брендсон Рибейромен күш сынасады.
Рибейро MMA-дағы кәсіби мансабын 2015 жылы бастаған. Ол 16 жекпе-жекте жеңіп, жетеуінде жеңілген. UFC-дегі алғашқы жеңісіне 2024 жылдың қарашаcында UFC Fight Night 246 турнирінде қол жеткізді. Ол кезде бразилиялық файтер жерлесі Кайо Мачадоны төрешілер шешімімен жеңген болатын.
Дияр Нұрғожай былтыр қазанда Dana White Contenders сериясында жеңіске жетіп, UFC-мен келісімшартқа отырған еді. Оның MMA-дағы рекорды – 10-0.
Еске салайық, қазақстандық файтер Асу Алмабаев наурызда өтетін UFC турнирінде чемпиондыққа бұрынғы үміткер аустралиялық Стив Эрцегпен (12-3) жекпе-жекке шығатынын жазғанбыз.
Мақаланың түпнұсқасы: https://kaz.nur.kz/sport/mma/2207943-qazaqstandyq-faiterding-ufc-degi-algashqy-qarsylasy-anyqtaldy/
