Туризм және спорт министрі Ермек Маржықпаев қазақстандық аралас жекпе-жек шебері Шавкат Рахмоновпен кездесті. Бұл туралы KAZ.NUR.KZ Ермек Маржықпаевтың Instagram-дағы ресми парақшасына сілтеме жасап хабарлайды.
Ермек Маржықпаев қазақстандық файтерді кейінгі жеңісімен құттықтап, тезірек әлем чемпионы болуына тілектестік білдірді.
"Аралас жекпе-жек әлеміндегі ең беделді ұйым – UFC-де өнер көрсетіп, жасындай жарқырап жүрген даңқты спортшымыз Шавкат Рахмоновпен кездесіп, ең кейінгі жарқын жеңісімен құттықтадым. Тәуелсіздік күні қарсаңында АҚШ файтері Стивен Томпсонды жеңген болатын.
Шавкат – мұхиттың арғы бетінде өткізіп жүрген жекпе-жектері арқылы елімізді бүкіл әлемге танытып жүрген батырымыз. Шавкатқа алдағы уақытта жеңісті жолын сәтті жалғап, тезірек әлем чемпионы болуына тілектеспін", – деп жазды Ермек Маржықпаев Instagram желісіндегі парақшасында.
Еске салайық, Шавкат Рахмонов америкалық файтер Колби Ковингтонмен жұдырықтасуы мүмкін екенін жазғанбыз. Қазір Шавкат Рахмонов UFC-дің жартылай орта салмақ бойынша рейтингінде 3-орында, ал Колби Ковингтон 5-орында тұр.
Мақаланың түпнұсқасы: https://kaz.nur.kz/sport/other-sports/2060978-alem-cempiony-boluyna-tilektespin-savkat-raxmonov-turizm-zane-sport-ministrimen-kezdesti/
