Францияда түсік жасату құқығы конституцияда бекітілді

Франция түсік жасату құқығын конституциямен бекіткен әлемдегі бірінші ел болды. 4 наурызда мемлекеттің негізгі заңына тиісті түзетулер енгізілді.

Версаль сарайында өткен парламенттің бірлескен отырысында депутаттар президент Эмманюэль Макронның елдің бас заңына түсік жасатуға "кепілдендірілген еркіндік" енгізу туралы бастамасын мақұлдады, деп жазады Euronews.

Бұл ұсынысты бұған дейін Франция сенаты да қолдаған. Дауыс беруге қатысқан 317 сенатордың 267-сі қолдап, 50-і қарсы болды.

Басылым өкілдері ел конституциясына түсік жасатуды енгізу символдық шара екенін, өйткені әйелдің өтініші бойынша түсік жасату мүмкіндігіне Франция заңы кепілдік бергенін атап өтті.

Айта кетейік, бұған дейін Франция парламентінің жоғарғы палатасы - сенат әйелдердің түсік жасату құқығын ел конституциясында бекітуді қолдағанын, басым дауыс жинағанын хабарлаған едік.

Мәтіннен қате тапсаңыз, бізге жазыңыз