Тоқаев Путинді сайлаудағы жеңісімен құттықтады

Қазақстан президенті Қасым-Жомарт Тоқаев Владимир Путинді Ресейдегі президент сайлауында айқын жеңіске жетіп, қайта президент атануымен құттықтады. Бұл туралы Ақордаға сілтеме жасаған KAZ.NUR.KZ хабарлайды.

"Қасым-Жомарт Тоқаев Владимир Путинді президент сайлауындағы сенімді жеңісімен құттықтады. Мемлекет басшысы Ресей президентінің стратегиялық бағдары жалпыхалықтық қолдауға ие болғанын атап өтті.

Тараптар стратегиялық серіктестік рухында қарқынды дамып келе жатқан екіжақты ынтымақтастық барысын талқылады. Мемлекеттер басшылары өзара тығыз ықпалдастықты жалғастыруға келісті", – делінген Ақорда хабарында.

Айта кетейік, бұған дейін Орталық сайлау комиссиясының алдын ала қорытындысын жариялаған едік. Ол бойынша

• Путин – 87,33 пайыз;
• Харитонов – 4,31 пайыз;
• Даванков – 3,79 пайыз;
• Слуцкий – 3,19 пайыз дауыс жинаған.

15 наурызда Ресей Федерациясында президент сайлауында дауыс беру басталды, сол күні шығыс аймақтарда, одан кейін республика бойынша сайлау учаскелері ашылды. Дауыс беру үш күнге созылды.

Сайлауда дауыс беруден Алматы мен Астанада тұрып жатқан ресейліктер де қалыс қалған жоқ. Кеше Қазақстанның екі ірі қаласында ұзын-сонар кезек пайда болды. Халық кезекте бір жарым-екі сағат тұрып дауыс берген.