Нетаньяху Газадағы ХАМАС батальондарының 80 пайызы жойылғанын хабарлады

Израиль премьер-министрі Биньямин Нетаньяху ЦАХАЛ алты ай ішінде ХАМАС-тың Газа секторындағы 24 батальонының 19-ын жойғанын айтты. Бұл жөнінде РБК сайтына сілтеме жасаған KAZ.NUR.KZ хабарлайды.

Нетаньяхудың сөзін израильдік БАҚ жариялаған.

"Жетістіктер керемет: біз ХАМАС-тың 24 батальонының 19-ын жойдық, оның ішінде аға командирлер де бар. Біз ХАМАС лаңкестерінің едәуір бөлігін өлтірдік, жараладық не тұтқынға алдық", - деді Нетаньяху.

Ол Израиль эксклавтың бүкіл аумағы бойынша, атап айтқанда оңтүстік аймақтағы Рафах қаласындағы ХАМАС-ты жоюды аяқтауға "толық бел буғанын" атап өтті.

Газа секторының Денсаулық сақтау министрлігінің мәліметі бойынша, қақтығыс кезінде 33 мыңнан астам палестиналық қаза тауып, 76 мыңға жуық адам жараланған.

Құрлықтағы операция басталғалы бері Цахал әскерилерінен 256 адам мерт болған, ал шабуыл кезінде 1,1 мың адам қаза тапқан. Тағы 1,5 мыңнан астам әскери қызметкер жараланған.

Израиль билігі 2023 жылғы 7 қазаннан бері соғыс ХАМАС жойылып, кепілге алынғандар босатылған жағдайда ғана аяқталатынын бірнеше рет мәлімдеген. Нетаньяху мұны "қасиетті миссия" деп атады.

Айта кетейік, жуырда Түркия президенті Режеп Тайип Ердоған Таяу Шығыста болып жатқан оқиғаларды "геноцид" деп атағанын жазған едік.

"Біздің ғасырдағы ең қатыгез геноцидтердің бірі Газада болып жатыр: онда 40 мыңға жуық бауырымыз, көбі балалар мен әйелдер көз жұмды, 73 мың палестиналық жараланды, 7 мыңнан аса жазықсыз адам қиранды астында қалды. Израильді сынаған Батыс елдерінің екіжүзділігі сол жаппай өлтіру үшін қару-жарақпен және оқ-дәрімен қолдады. Олар Газаны балалар мен әйелдердің әлемдегі ең үлкен зиратына айналдырды", - деді Түркия президенті.