Бішкектегі мектептердің біріне Кемел Тоқаевтың есімі берілді

Бішкектегі №33 мектеп-гимназиясы енді Қасым-Жомарт Тоқаевтың әкесі Кемел Тоқаевтың есімімен аталады, деп хабарлайды KAZ.NUR.KZ 24.kg сайтына сілтеме жасап.

Қырғызстан президентінің баспасөз хатшысы Асқат Алагөзовке сілтеме жасаған басылым қазақ прозасындағы детектив жанрының негізін салушы Кемел Тоқаевтың есімін беру бастамасы Қырғызстан президенті Садыр Жапаровқа тиесілі екенін мәлім етті.

Асқат Алагөзов сондай-ақ Қырғызстан президенті Ресейге жұмыс сапары барысында Қасым-Жомарт Тоқаевқа бұл жаңалықты жеткізгенін атап өтті.

Соғыс жылдарында №33 мектеп Қазақстан президентінің әкесі бітірген Фрунзе әскери жаяу әскер училищесі болды. Осы жерден ол майданға шақырылды.

Бұған дейін Ресей президенті Владимир Путин мемлекет басшысы Қасым-Жомарт Тоқаевқа әкесі, гвардия сержанты Кемел Тоқаевты марапаттау парағын табыстағанын хабарлағанбыз.