Шемонаиха қаласындағы жарылыстан зардап шеккен екі адам ауруханада көз жұмды

ШҚО-ның Шемонаиха қаласында газ баллонын толтыру станциясында болған жарылыстан зардап шеккен екі адам ауруханада көз жұмды. Бұл туралы ШҚО денсаулық сақтау басқармасы баспасөз қызметі хабарлады, деп жазады KAZ.NUR.KZ.

ШҚО денсаулық сақтау басқармасы баспасөз қызметінің мәліметінше, барлық реанимациялық шараға қарамастан, екі ер адамды аман алып қалу мүмкін болмаған.

"Олардың денесінің 98 пайызын күйік шалған, жағдайлары өте ауыр болды. Дәрігерлер тәулік бойы олардың өмірі үшін күресті, қолдан келгеннің бәрін жасады, басқарма басшылығы да тікелей сол жерде болды. Әр сағат сайын телемедициналық жүйе арқылы зардап шеккендердің жағдайы туралы облыстық және республикалық дәрігерлермен кеңес өткізілді", - дейді ШҚО денсаулық сақтау басқармасының баспасөз хатшысы Әсем Сексенова.

Оның ақпаратынша, зардап шеккендер оқиғадан кейін 48 сағаттан соң қайтыс болған.

ШҚО денсаулық сақтау басқармасының баспасөз хатшысы 22 маусымдағы жарылыс кезінде зардап шеккен тағы екі науқас ауруханада ем қабылдап, олардың сауығып келе жатқанын атап өтті.

"Олардың жағдайы да тұрақты бақылауда, сағат сайынғы телемедициналық кеңестер жалғасуда", - дейді ол.

Айта кетейік, 22 маусымда ШҚО-дағы Шемонаиха қаласында газ баллонын толтыру станциясында жарылыс болып, салдарынан өрт шығып, күйік шалған екі адам ауруханаға жеткізілген болатын.

Кейін ШҚО денсаулық сақтау басқармасы Шемонаиха аудандық ауруханасына төтенше жағдайдан зардап шеккен тағы екі адамның жеткізілгенін хабарлаған еді.

Мәтіннен қате тапсаңыз, бізге жазыңыз