Алматылық косметологтың өлімі: Сотталғандар судьяның қатесін тауып, істі кері қайтарғызған

Алматы қаласында қатігездікпен өлтірілген Батура Мамедованың ісіне қатысты сот отырысы қайта басталды. Аталған іс бойынша өткен жылы үкім шығып, күдікке ілінген ерлі-зайыптылар ұзақ мерзімге темір торға тоғытылған болатын. Алайда сотталушылар судьяның жіберген қатесін тауып, істі кері қайтарғызған деп хабарлайды KAZ.NUR.KZ порталы КТК телеарнасына сілтеме жасап.

Судья Мұхитдин Тоқтахунов соттың қайта басталу себебін түсіндіріп берді.

"Сот мәжілісінде жәбірленуші жақ "біз қазақша түсінбейміз" дегендіктен, осы істі қараған судья орысша жүргізген. Бірақ сотталушыларға аудармашы қатыстырылған. Енді "істің тілі бұзылды" деп отыр", - дейді ол.

Телеарна мәліметінше, аталған іс о бастан қазақша қаралу керек болған. Алайда жәбірлену тарап қазақ тілін түсінбегендіктен, процесс басынан аяғына дейін орыс тілінде өтіпті.

Үкім шыққаннан кейін, сотталушылар құқығының бұзылғанын айтыпты. Олар орысша түсінбейтіндерін басында ескерткен екен.

Яғни, судья сотталғандардың құқығына атүсті қараған болып шыққан. Енді осының салдарынан үш айға созылып, 2019 жылы қарашада үкім шыққан іс қайта қарала бастаған. Осы уақыт аралығында 11 рет сот отырысы өткен.

Дереккөз: КТК телеарнасы

Еске сала кетсек, Алматы облысында із-түссіз жоғалған сұлулық салонының қызметкері Батура Мамедованың денесі үш аптадан соң көрші ауданнан табылған еді.

Кейін күдікті ретінде азаматтық некедегі ерлі-зайыптылар ұсталған болатын.

Аталған іс бойынша қылмыстық іс қозғалып, косметолог келіншекті өлтіргендерге өткен жылы қараша айында сот үкімі шыққан.

Ең маңызды әрі қызықты жаңалықтарды біздің Telegram арнамыздан оқыңыздар!

Мәтіннен қате тапсаңыз, бізге жазыңыз