RU

Үкімет биыл теңге бағамы бір доллар үшін қанша болатынын болжады

Көрнекі фото
Көрнекі фото: NUR.KZ

Қазақстан үкіметі әлеуметтік-экономикалық дамудың 2021 жылға арналған болжамының көрсеткіштері мен индикаторларын қайта қарады деп хабарлайды Sputnik Қазақстан.

"2021 жылы жалпы ішкі өнімнің нақты өсуі – 3,1%, мұнай бағасы – бір баррель үшін 50 доллар,  ұлттық валюта бағамы бір доллар үшін 425 теңге деңгейінде болжанып отыр", - деді Мамин үкімет отырысында.

Оның сөзінше, 2021 жылға арналған нақтыланған бюджет шығыстары негізінен "Nur Otan" партиясының бағдарламасы мен президенттің 2020 жылы 1 қыркүйектегі жолдауын іске асыруды қамтамасыз етеді. 

Сонымен қатар бұл шығыстар пандемиямен күрес шараларын қаржыландыруға және денсаулық сақтау жүйесін жаңғыртуға, сондай-ақ экономиканың нақты секторын ынталандыруға бағытталған.

Ұлттық банктің болжамына сүйенсек, 2021 жылы экспорт 10,8 миллиард долларға, яғни 52,2 миллиард долларға дейін ұлғаяды. Импорт 37,1 миллиард долларды құрайды. Инфляция бұрын бекітілген 4,0-6,0 пайыз дәлізде сақталды.

Үкімет ұсынылған әлеуметтік-экономикалық дамудың нақтыланған болжамын мақұлдап, бюджетті нақтылау бойынша тиісті заң жобасына және тиісті жарлық жобасын қолдап дауыс берді.

Мамин қаржы министрлігіне нақтыланған республикалық бюджет туралы заң жобасын және әлеуметтік-экономикалық даму болжамын парламентке енгізуді тапсырды.

Мақаланың түпнұсқасы: https://kaz.nur.kz/nurfin/1908896-ukimet-biyl-tenge-bagamy-bir-dollar-usin-qansa-bolatynyn-bolzady/