Алматыда "L-Капитал" компаниясының негізін қалаушы ұсталды

Алматы полицейлері "L-Капитал" компаниясының негізін қалаушыны ұстады деп хабарлайды Polisia.kz.

Алматы полиция департаменті тергеу басқармасының мәліметі бойынша, жедел-іздестіру іс-шаралары барысында 1962 жылы туған азаматша ұсталған.

Ол Қылмыстық-кодекстің 128-бабына сәйкес полиция департаментінің уақытша ұстау изоляторына қамалған.

"Аталған компанияның салымшыларының ұжымдық мәлімдемелеріне сәйкес, Қылмыстық кодекстің 217-бабының 3-бөлігі (Қаржылық (инвестициялық) пирамиданы құру және оған басшылық ету) бойынша сотқа дейінгі тергеу басталғанын бұрын хабарлаған едік. Ведомствоаралық тергеу-жедел тобы құрылды.

Компанияның кеңселерінде тінтулер жүргізілді. Толықтық, объективтілік және жан-жақтылық принциптерін қатаң сақтай отырып жүргізілген тергеу әрекеттерінің кешені барысында мән-жайлар анықталып, процессуалдық шешім қабылданады. Қазіргі уақытта қылмыстық іс бойынша 50 адам жәбірленуші ретінде танылған", – дейді Алматы қалалық полиция департаменті бастығының орынбасары Рүстем Абдрахманов.

Еске салсақ, бұған дейін Түркістан облысының полицейлері онлайн-алаяқтықпен айналысып, азаматтарға өз табысын арттыруды ұсынған екі күдіктіні ұстағанын жазған болатынбыз.

Қазіргі уақытта күдіктілер ешқайда кетпеу туралы қолхатпен босатылған.