RU

Алматыда Шарын шатқалында аман қалған қыз бала мен ата-анасы марапатталды

Шарын
Фото: ТЖМ баспасөз қызметі

29 мамырда Алматыда Шарын шатқалында қысқа мерзімді нөсер жаңбыр салдарынан болған су тасқыны кезінде аман қалған 11 жасар Зере мен оның ата-анасы төтенше жағдайлар министрі Юрий Ильиннің Алғыс хатымен марапатталды. Бұл туралы KAZ.NUR.KZ ТЖМ баспасөз қызметіне сілтеме жасап хабарлайды.

Бүгін қыз бала ауруханадан шықты.

Алғыс хатты министрдің атынан Алматы қаласы ТЖ департаментінің бастығы табыс етіп, Зеренің ата-анасы-Ұлан Бисембайұлы мен Жания Шымырбекқызына батыл, ержүрек қыз тәрбиелегені үшін, ал кішкентай Зереге төтенше жағдайларда төзімділік, қайсарлық және өмір сүру әдістерін дұрыс қолданғаны үшін алғыс айтты.

Шарын
Фото: ТЖМ баспасөз қызметі

Министрдің хатында "Алматы қаласындағы №199 гимназиясының оқушысы Бисембай Зере Ұланқызы табиғи апат салдарынан қауіпті жағдайға тап болып, орын алған жағдайларды байыппен сабырлы бағалап, өмір сүрудің практикалық дағдыларын қолдана білді. Бұл жағдай еліміздің азаматтары үшін өмір қауіпсіздігін қамтамасыз ету дағдыларын игеру және батылдық, байсалдылық және күйзеліске қарсы тұру сияқты тұлғалық қасиеттерді тәрбиелеуде үлгі болып табылады", - деп жазылған.

Шарын
Фото: ТЖМ баспасөз қызметі

Еске сала кетсек, 29 мамырда Алматы облысының Шарын шатқалында сел жүріп, 2 адам көз жұмып, тағы 6 адам зардап шегіп, бір оқушы жоғалып кеткен еді.

Кейін еліміздің білім және ғылым министрлігі аталған оқиға салдарынан 1 оқушы мен 1 мұғалімнің қаза тапқанын мәлім етті. Сондай-ақ, сел кезінде жоғалып кеткен оқушы қыздың табылғаны хабарланды.

Мемлекет басшысы Қасым-Жомарт Тоқаев оқушыларды құтқарамын деп мерт болған № 199 мамандандырылған гимназия" КММ мұғалімі Мерей Ибрагимовтың жақындары мен туыстарына көңіл айтты.

Сонымен қатар, президент марқұм Мерей Ибрагимовті "Ерлігі үшін" медалімен марапаттады.

Мақаланың түпнұсқасы: https://kaz.nur.kz/society/1916189-almatyda-saryn-satqalynda-aman-qalgan-qyz-bala-men-ata-anasy-marapattaldy/