Атырауда 8 жасар оқушы суға батып кете жаздаған екі жеткіншекті құтқарып қалды (видео)

Атырауда 8 жасар оқушы суға батып кете жаздаған екі жеткіншікті құтқарып қалды, деп хабарлайды ІІМ-нің Telegram-дағы POLISIA.KZ ресми жаңалықтар арнасы.

Ведомствоның мәліметінше, оқиға 3 желтоқсанда Атырау қаласындағы Жұмыскер көпірі маңында болған. 2008 жылғы және 2013 жылғы екі оқушы мұз үстінде ойнап жүріп, кенеттен мұз ойылып, балалар суға түсіп кеткен.

Болған жайтты көрген 8 жасар Дінмұхаммед Жаңбырбай еш қорықпай, мұз үстімен балаларға барып, оларды судан шығарып алған.

Ал оқиға орнына жеткен полицейлер балаларға көмектесіп, аман-есен ата-аналарына тапсырған.

"Дінмұхаммедке ержүрек әрекеті үшін алғыс білдіремін. Ол болмағанда бұның соңы қайғылы жағдаймен аяқталушы ме еді?! Осындай батылдығы үшін ол зор құрметке лайық. Ержүрек қасиетке баулап өсірген ата-анасына да көп рақмет! Дені сау болып, өсе берсін", - дейді 9 жастағы жеткіншектің анасы.