Дулат Бекбауов Азия чемпионатының ширек финалына шықты

Бокстан Қазақстан ерлер құрамасының мүшесі Дулат Бекбауов Таиландағы Азия чемпионатының ширек финалына өтті. Бұл туралы KAZ.NUR.KZ тілшісі хабарлайды.

Бүгін, 30 қарашада басталған Азия біріншілігінде Қазақстан құрамасынан бірінші болып шаршы алаңға Дулат Бекбауов шықты. Ол 67 кг салмақ дәрежесінде тайпейлік Джиа-Джун Чиуан Вангпен жұдырықтасып, 5:0 есебімен жеңіске жетті.

Бекбауовтың ендігі жекпе жегі 4 желтоқсанда өтеді. Оның қарсыласы бүгін Малайзия-Жапония боксшыларының кездесуінен соң анықталады.

Еске салайық, Қазақстан ерлер құрамасы боксшыларының Азия чемпионатындағы алғашқы қарсыластары белгілі болған еді. Сондай-ақ әйелдер командасы спортшылары да бірінші жекпе-жегін кіммен өткізетіні анықталды.

Алғашында бокстан Азия біріншілігі Иордания астанасы – Амманда болуға тиіс еді. Алайда өңірдегі қауіпсіздік мәселесі ескеріліп, чемпионат Таиландқа ауыстырылды. Осылайша, Таиланд Корольдігі 1963 жылдан бері ұйымдастырылып келе жатқан бокстан Азия чемпионатын өз тарихында 9-мәрте қабылдап отыр.

Мәтіннен қате тапсаңыз, бізге жазыңыз