"Реал Мадрид" футбол клубына Испания чемпионатының (Ла Лига) кубогы табысталды. Команда жанкүйерлермен бірге жеңісті тойлады, деп хабарлайды KAZ.NUR.KZ тілшісі.
Бүгін, 12 мамырда "Реал Мадрид" командасына клубтың Мадридтегі базасында Ла Лиганың кубогы табысталды. Команда капитаны Начо Фернандес кубокты Испания футбол федерациясының президенті Педро Рочидің қолынан алды. Кейін жеңімпаздар трофейді жанкүйерлерге көрсетіп, "Сибелес" алаңында жеңісті тойлады.
Еске салайық, "Реал Мадрид" 4 мамырда "Кадис" футбол клубын 3:0 есебімен ұтып, уақытынан бұрын Ла Лига чемпионы атанған еді. Бұл – команданың Испания чемпионатындағы 36-жеңісі.
Айта кетейік, "Реал Мадрид" 9 мамырда "Баварияны" 2:1 есебімен жеңіп, Чемпиондар лигасының финалына шыққан болатын. Енді ақтық сында мадридтік клуб "Боруссияға" қарсы ойнайды. Матч 1 маусымда Лондондағы "Уэмбли" алаңында өтеді.
Мақаланың түпнұсқасы: https://kaz.nur.kz/sport/football/2099081-real-madrid-futbol-kluby-ispaniia-chempionatyndagy-36-zhengisin-toilady-video/
