Қазақстандық аралас жекпе-жек шебері Асу Алмабаев UFC-дегі екінші жеңісіне қол жеткізді. Бұл туралы KAZ.NUR.KZ тілшісі хабарлайды.
Асу Алмабаев Майамиде (АҚШ, Флорида штаты) өткен UFC 299 турнирі аясында кездесу өткізді. Оның қарсыласы АҚШ өкілі Си Джей Вергара болды. Үш раундқа созылған жекпе-жекте қазақстандық файтер төрешілердің шешімімен жеңіске жетті (30:27, 30:27, 30:27). Осылайша Алмабаев кәсіби мансабындағы он тоғызыншы, ал UFC-дегі екінші жеңісіне ие болды. Ал Си Джей Вергара мансабында бесінші рет жеңіліс тапты.
Еске салайық, Асу Алмабаев өткен жылы тамыз айында UFC-де дебют жасаған еді. Ол кезде қазақстандық аралас жекпе-жек шебері америкалық файтер Оди Осборнды (12-6) екінші раундта сабмишн әдісімен ұтты.
Айта кетейік, Асу Алмабаев UFC-дегі екінші жекпе-жегіне дайындалып жатқанын жазғанбыз. Ол Си Джей Вергараға қарсы кездесуге "Жұмыр қылыш" күйімен шығатынын айтқан еді.
Мақаланың түпнұсқасы: https://kaz.nur.kz/sport/mma/2065641-asu-almabaev-ufc-degi-ekinsi-zekpe-zegin-de-zenispen-ayaqtady/
