Елена Рыбакина әлемнің екінші ракеткасын ұтып, WTA 500 турнирінің жеңімпазы атанды

Қазақстанның бірінші, әлемнің төртінші ракеткасы Елена Рыбакина Брисбен (Аустралия) WTA 500 турнирінде жеңіске жетті. Бұл туралы KAZ.NUR.KZ тілшісі хабарлайды.

Финалда Елена Рыбакина әлемнің 2-ракеткасы, Беларусь теннисшісі Арина Соболенкомен кездесті. Алғашқы сетте қазақстандық теннисші қарсыласын 0:6 есебімен қапыда қалдырды.

Ал екінші cетте Рыбакина 3:6 есебімен Соболенкодан тағы да басым түсті.

Еске салайық, Рыбакина WTA 500 турниріндегі алғашқы ойынында аустралиялық теннисші Оливия Гадекиді 2:0 (6:4, 6:1) есебімен жеңген еді.

Кейін турнирдің 1/8 финалында қазақстандық теннисші әлемнің 30-ракеткасы, бельгиялық Элизе Мертенспен ойнады. Бірінші партияда Рыбакина қос брейк жасап, 6:1 есебімен басым түссе, екінші партияда қарсыласын 6:0 есебімен ұтты.

Елена Рыбакина ширек финалда дүниежүзілік рейтингте 28-орында тұрған ресейлік Анастасия Потаповамен ойнап, алғашқы сетте 6:1 есебімен жеңді. Ал Потапова жарақатына байланысты ойынды жалғастырудан бас тартты.

Жарыстың жартылай финалында қазақстандық теннисші дүниежүзілік рейтингте 40-орында тұрған 19 жастағы чехиялық Линда Носковамен ойнады. Бірінші сетте Рыбакина 6:3 есебімен алға шықса, екінші сетті 6:2 есебімен түйіндеді. Осылайша турнирдің финалына шыққан болатын.

Мәтіннен қате тапсаңыз, бізге жазыңыз