Азия чемпионатында тағы бір қазақстандық спортшы алтын медаль иеленді

Қазақстандық гимнаст Айбота Ертайқызы Ташкенттегі Азия чемпионатында алтын жүлде еншіледі. Бұл туралы KAZ.NUR.KZ Ұлттық Олимпиада комитетінің ресми сайтына сілтеме жасап хабарлайды.

Айбота Ертайқызы таспамен жаттығуда 32,90 ұпай жинап, топ жарды. Күміс жүлдені өзбекстандық Тахмина Икромова, қоланы жапондық Рейна Мацусака қанжығалады.

Айта кетейік, Айбота Ертайқызы доппен жаттығуда күміс, шығыршықпен жаттығуда қола медаль еншіледі.

Осыған дейін тағы бір қазақстандық гимнаст Эльжана Таниева шығыршықпен жаттығу бойынша үздік атанып, алтын жүлде иеленген еді. Ол сондай-ақ көпсайыстан да бірінші орын алып, Париж Олимпиадасына жолдама жеңіп алды.

Ташкенттегі Азия чемпионатында Қазақстан құрамасы командалық сайыстар бойынша да сәтті өнер көрсетіп жатыр. Ересектер құрамасы бес шығыршықпен жаттығуда қола жүлдегер атанса, жасөспірімдер құрамасы командалық көпсайыстан алтын және күміс медальға қол жеткізді.