Қарақалпақстанда төтенше жағдай режимі мерзімінен бұрын тоқтатылды

Өзбекстан президенті Шавкат Мирзиеев 21 шілде күні сағат 5:00-ден бастап Қарақалпақстан аумағында төтенше жағдай режимін мерзімінен бұрын тоқтату туралы жарлыққа қол қойды. Бұл туралы Өзбекстан президентінің ресми сайты хабарлады.

"2022 жылы 21 шілдеде сағат 05.00-ден бастап (Нұр-Сұлтан уақыты бойынша 06.00) Қарақалпақстан республикасының аумағында төтенше жағдай режимі мерзімінен бұрын тоқтатылсын", - делінген президент жарлығында.

Белгілі болғандай, мұндай шешім Қарақалпақстан республикасы Жоғарғы кеңесінің төтенше жағдай режимін мерзімінен бұрын тоқтату туралы өтінішінен кейін қабылданған.

Шешім қабылдау кезінде Қарақалпақстан республикасы аумағында қоғамдық тәртіптің қалпына келгені, сондай-ақ азаматтардың қауіпсіздігін қамтамасыз ету, олардың құқығы мен бостандығын қорғау бойынша шаралар қабылданғаны ескерілген.

Айта кетейік, Қарақалпақстанда төтенше жағдай режимі шілденің басында болған елдегі тәртіпсіздікке байланысты енгізілген еді.

Қарақалпақстанда тәртіпсіздікке ұласқан шерулер Өзбекстан Конституциясына енгізілгелі отырған түзетулерге байланысты туындаған болатын.

1992 жылдың 8 желтоқсанында қабылданған құжатта Қарақалпақстан референдум негізінде Өзбекстан құрамынан шығуға құқығы бар егемен ел деп көрсетілген. Алайда Конституцияға енгізілгелі отырған жаңа түзетулерге сәйкес, бұл норманы алып тастау көзделген еді.

Халықтың наразылығынан кейін Шавкат Мирзиеев Қарақалпақстан егенмендігіне қатысты Конституцияға енгізгелі отырған түзетулерді алып тастау туралы қаулыға қол қойды.

Одан бөлек Нүкістегі тәртіпсіздіктер кезінде 18 адам қаза тапқаны айтылды.