СІМ: Түркиядағы жер сілкінісінен зардап шеккен қазақстандықтар туралы ақпарат жоқ

Қазақстан Сыртқы істер министрлігінің ресми өкілі Айбек Смадияров ведомтсвода өткен брифингте Түркиядағы жер сілкінісі салдарынан зардап шеккен немесе қаза тапқан қазақстандықтар бар ма деген сауалға жауап берді, деп жазады KAZ.NUR.KZ

Айбек Смадияров елшілік үнемі байланыста екенін хабарлады.

"Түркия Республикасындағы елшілігіміздің мәліметінше, Астана уақыты бойынша сағат 15:00-дегі жағдайға сәйкес Түркияның оңтүстік-шығысында болған жойқын жер сілкінісінен кейін Қазақстан азаматтарынан өтініштер түскен жоқ.

Консул Түркияның төтенше жағдайлар департаментімен тұрақты байланыста. Қазіргі уақытта тізімде зардап шеккен немесе қаза тапқан Қазақстан Республикасының азаматтары жоқ", - деді Смадияров.

Сонымен қатар ол көптеген тұрғын үйдің қирауына байланысты қазіргі таңда іздестіру жұмыстары жалғасып жатқанын атап өтті.

Еске сала кетейік, кеше түнде Түркияның оңтүстік-шығысында магнитудасы 7,5 бал болатын күшті жер сілкінісі тіркелді.

Жерасты дүмпулері тек Түркияда ғана емес, көршілес Сирия мен Ливияда да сезілді. Жер асты дүмпуі салдарынан ғимараттар қирады.

Соңғы мәлімет бойынша, төтенше жағдай салдарынан кем дегенде 500 адам қаза тапты, оның 230-дан астамы сириялықтар, сондай-ақ кем дегенде 280 түрік азаматы көз жұмды.

Айта кетейік, бұған дейін президент Қасым-Жомарт Тоқаев Түркия басшысы Режеп Тайып Ердоғанға жеделхат жолдаған болатын. Ол түрік халқына көңіл айтып, көмек көрсетуге дайын екенін мәлімдеді

Мәтіннен қате тапсаңыз, бізге жазыңыз