Солтүстік Корея зымыран шығаратын зауытын кеңейтіп жатыр

Америкалық сараптама орталығының жаңа зерттеуіндегі мәліметке қарағанда, Солтүстік Корея Ресейдің Украинаға қарсы қолданып жүрген зымырандарын шығаратын зауытты кеңейтіп жатыр. Бұл туралы KAZ.NUR.KZ CNN телеарнасына сілтеме жасай отырып хабарлайды.

Миддлбери халықаралық зерттеулер институты мамандарының айтуынша, осы кәсіпорында KN-23 (Hwasong-11A) және KN-24 (Hwasong-11B) зымырандары шығарылады.

Зауыт КХДР-дегі екінші ірі қала саналатын Хамхында орналасқан. Кәсіпорынға Солтүстік Корея башысы Ким Чен Ын бірнеше мәрте барған, ал мемлекеттік БАҚ тактикалық зымыран өндірісін насихаттаған.

Украин әскерилерінің айтуынша, Украина жақында Ресейдің баллистикалық зымырандары шабуылына ұшырады, сол кезде қолданылған зымырандардың үштен бірі Солтүстік Кореяда өндірілгені мәлім болды.

Батыс елдері мен Оңтүстік Корея шенеуніктері Мәскеу мен Пхеньянның әскери байланысы нығайып келе жатқанын мәлімдеп отыр.

Енді спутниктер түсірген жаңа суреттерде Солтүстік Кореяның Хамхындағы зауытын кеңейтіп жатқаны анықталды. Қазір кәсіпорында екінші ғимарат пен жұмысшылар тұратын қосымша жатақхана салынып жатыр.

"Соған қарағанда, олар өндірісті арттыруды көздейді", - дейді зерттаулар орталығының ғылыми маманы Сэм Лэр CNN телеарнасына.

Зауыт аумағы 2020 жылдан бері кеңейіп жатыр. Кәсіпорында ескі ғимараттар жөнделіп, олардың шатыры ауыстырылған.

Солтүстік Корея баспасөзі 2023 жылғы тамызда Ким Чен Ынның осы зауытты аралағанын көрсеткен, бірақ суреттер артынша мемлекеттік БАҚ-тан өшірілген.

Биыл Ресей Солтүстік Кореяның 60-қа жуық KN-23 (Hwasong-11A) зымыранымен Украинаны атқылаған. Украина бас прокуроры өткен аптада CNN телеарнасына КХДР зымырандарының шабуылдары салдарынан кем дегенде 28 адам қаза тауып, 213 адам жараланғанын хабарлаған.

Өткен аптада Оңтүстік Корея шенеунігі КХДР Ресейге 10 мыңнан аса жауынгер жіберіп, оның орнына Кремльден әуе қорғанысы жүйесін алды деп мәлімдеген.