"Қазақстан" шахтасында қаза тапқан тағы екі кеншінің аты-жөні белгілі болды

Қарағанды облысындағы "Қазақстан" шахтасында қаза болған тағы екі кеншінің аты-жөні белгілі болды. Бұл туралы KAZ.NUR.KZ тілшісі "АрселорМиттал Теміртау" АҚ-ның баспасөз қызметіне сілтеме жасап хабарлайды.

Айта кетейік, бұған дейін компания шахтадағы апат кезінде 1965 жылы туған жерасты электр шебері (еңбек өтілі – 39 жыл) Слюньков Виталий Владимировичтің қайтыс болғанын хабарлаған еді.

Кейін іздестіріліп жатқан бес кеншінің тағы екеуінің денесі табылды.

Компания мәліметінше, қазіргі таңда олардың да аты-жөні белгілі болған. Шахтада қаза болған марқұмдар:

• 1. 1978 жылы туған, 4-разрядты жерасты үңгушісі Стешин Денис Геннадьевич, еңбек өтілі – 21 жыл;
• 2. 1966 жылы туған, 5-разрядты жерасты электр шебері Бургун Виктор Сергеевич, еңбек өтілі – 39 жыл.

"Екі кеншіні іздестіру жұмыстары жалғасуда. Қазіргі сәтте тау қазбасында іздеу бойынша қосымша жоспар жасалып жатыр", - дейді "АрселорМиттал Теміртау" АҚ-ның баспасөз қызметіндегілер.

"Қазақстан" шахтасындағы апат

Еске сала кетейік, 17 тамызда сағат 10:05-те "АрселорМиттал Теміртау" АҚ көмір департаментінің "Қазақстан" шахтасында Д6 көмір еңісін игеру барысында конвейерлік таспа өртенді.

Өрт кезде жер астында 227 адам болғаны, олардың 222-сі жер бетіне шығарылып, бесеуінің іздестіріліп жатқаны белгілі болды.

Сондай-ақ өрттен зардап шеккен 13 адамның жағдайы айтылды.

Бүгін үкімет басшысы Әлихан Смайылов Қарағанды облысына барып, апат салдарынан қаза тапқан шахтерлардың жақындарымен кездесіп, ауруханада жатқан зардап шеккен кеншілердің халін сұрады.