"Қазақстан" шахтасындағы апат: төртінші кеншінің денесі табылды

"Қазақстан" шахтасында жоғалған төртінші кеншінің денесі табылды, деп хабарлайды KAZ.NUR.KZ тілшісі "АрселорМиттал Теміртау" АҚ-ның баспасөз қызметіне сілтеме жасап.

"Төртінші кеншінің денесі табылды. Ол – 1994 жылы туған, 4-разрядты жерасты электр шебері Халиков Артур Ринатович. Оның еңбек өтілі – 10 жыл. Марқұмның әріптестері мен компанияның барлық ұжымы мезгілсіз өмірден өткен әріптесіміздің туыстары мен жақындарына қайғыларына ортақтасып көңіл айтады", - делінген хабарламада.

Еліміздің Төтенше жағдайлар министрлігінің хабарлауынша, төртінші кеншінің денесі бүгін, 19 тамызда сағат 18:14-те табылған. Марқұмның денесі тау-кен құтқару взводы командирінің орынбасары Самат Шошимовтың басшылығымен, екі бөлімшенің күшімен табылған.

"КӘАҚҚ РОШ бөлімшелері Д-6 конвейерлік беткейінде жоғарыдан төмен қарай бесінші кеншінің болжамды орналасу бағытында іздестіруді жалғастыруда", - дейді ТЖМ өкілдері.

ТЖМ мәліметінше, іздестіру жұмыстарына апатты учаскедегі үздіксіз түтін, жоғары температура (65 градус) және үйінділер түріндегі кедергілер қиындық келтіруде.

Сондай-ақ ведомство жергілікті өрт ошақтарын сөндіру жұмыстары тоқтатылғанын, барлық күш іздестіру жұмысына бағытталғанын атап өтті.

"Қазақстан" шахтасындағы апат

Еске сала кетейік, 17 тамызда сағат 10:05-те "АрселорМиттал Теміртау" АҚ көмір департаментінің "Қазақстан" шахтасында Д6 көмір еңісін игеру барысында конвейерлік таспа өртенді.

Өрт кезде жер астында 227 адам болғаны, олардың 222-сі жер бетіне шығарылып, бесеуінің іздестіріліп жатқаны белгілі болды.

Кейін үш кеншінің денесі табылды. "АрселорМиттал Теміртау" АҚ олардың аты-жөнін хабарлады.

Сондай-ақ өрттен зардап шеккен 13 адамның жағдайы айтылды.

Бүгін үкімет басшысы Әлихан Смайылов Қарағанды облысына барып, апат салдарынан қаза тапқан шахтерлардың жақындарымен кездесіп, ауруханада жатқан зардап шеккен кеншілердің халін сұрады.