Қаза тапқандар тізімі нақтыланып жатыр: ТЖМ Ақтаудағы ұшақ апатына қатысты жаңа ақпарат жариялады

Ақтау маңындағы ұшақ апатынан кейін құтқару жұмыстары әлі де жалғасып жатыр. Қазіргі уақытта медициналық мекемелерде 29 адам ем алуда, олардың екеуі – балалар. Бұл туралы KAZ.NUR.KZ төтенше жағдайлар министрлігіне сілтеме жасап хабарлайды.

"Қазіргі уақытта ауруханада 29 адам жатыр, оның 2-і бала. Қазіргі уақытта құтқару жұмыстары жалғасуда", - делінген министрлік хабарламасында.

Апатқа қатысты жедел штабтар Астана қаласындағы қолбасшылық орталығында және Маңғыстау облыстық төтенше жағдайлар департаментінде құрылған. Тұрғындар көмек пен ақпарат алу үшін ашылған сенім телефондарына жүгінуде. Осы уақытқа дейін 296 қоңырау түскен.

Қаза тапқандар мен зардап шеккендердің тізімдері жаңартылып, жедел түрде жарияланып жатыр.

Құтқарушылар оқиға орнында әлі де жұмыс істеп, іздестіру шараларын жалғастыруда.

Сонымен қатар Әзербайжан Республикасының Төтенше жағдайлар министрі генерал-полковник Камаладдин Фаттах оглы Гейдаров жағдайды бақылау және көмек көрсету үшін Ақтауға арнайы ұшып келді.

Еске салсақ, бүгін, 25 желтоқсанда Бакуден Грозныйға бет алған ұшақ Ақтау маңында апатқа ұшырады.

Маңғыстау облысы баспасөз қызметінің хабарлауынша, 25 желтоқсан күні сағат 10:58-де 1-ші санатты жедел жәрдем шақыру түскен. Оқиға орнына 22 жедел-жәрдем бригадасы жіберілген.

Қазақстан Көлік министрлігі алдын ала ақпаратқа сәйкес ұшақ бортында 62 жолаушы мен 5 экипаж мүшесі болғанын хабарлады.

Кейін Төтенше жағдайлар министрлігі Ақтау маңында болған ұшақ апаты туралы нақтыланған деректерді жариялады. Ұшақ бортында 69 адам болған, оның бесеуі – экипаж мүшесі.

Бортта 49 Әзербайжан, 16 РФ, 6 Қазақстан, 3 Қырғызтан азаматы болған. 28 адам ауруханаға жатқызылды, оның ішінде екеуі бала.

Апатқа байланысты Төтенше жағдайлар министрлігі жедел желі іске қосты.

Аzerbaijan Airlines (AZAL) әуе компаниясы Telegram-дағы ресми арнасында Баку-Грозный бағытында ұшып бара жатып, Ақтау маңына құлаған ұшақ бортында болған жолаушылар тізімін жария етті.

Сондай-ақ Ақтаудағы ұшақ апатынан аман қалғандардың тізімі және экипаж мүшелерінің тізімі шықты.

Ақтауда жаңажылдық шырша жағу шарасы ұшақ апатына байланысты өтпейтін болды.

АZAL әуе компаниясы ұшағының апатқа ұшырау фактісі бойынша Ішкі істер министрлігі Қылмыстық кодексінің 344-бабының 3-бөлігі, яғни екі немесе одан да көп адамның өліміне әкеп соққан әуе көлігінің қозғалысы немесе пайдалану қауіпсіздігі қағидаларын бұзу бойынша қылмыстық іс қозғады.

Жалпы апат орнынан 29 адам облыстың медициналық мекемелеріне жеткізілген. Олардың 27-сі Маңғыстау облыстық ауруханасына түсті.

Денсаулық сақтау министрлігі мәліметінше, 27 адамның 11-інің жағдайы ауыр. Қазіргі уақытта олар жансақтау бөлімінде жатыр.

Сонымен қатар облыстық балалар ауруханасына 11 және 16 жастағы екі бала жеткізілді. Екеуіне де ота жасау жоспарлануда.