Алматы әкімдігі қалада картопқа қатысты жағдай қандай екенін айтты

Алматы әкімдігі қалада картоп тапшылығы жоқтығын мәлімдеді. Бұл туралы мемлекеттік мекеменің баспасөз қызметіне сілтеме жасаған KAZ.NUR.KZ хабарлайды.

Алматы әкімдігінің баспасөз қызметі NUR.KZ тілшісіне бүгін, 25 қаңтардағы жағдай бойынша картоп бағасына қатысты ақпарат берді.

Аудан әкімдері аппаратының қызметкерлері ірі нарықтарда күнделікті мониторинг жүргізіп жатқаны хабарланды. Әкімдіктің мәліметінше, бүгінде нарықтағы картоптың орташа бағасы 350 теңге/кг.

"Мониторинг барысында бағаның негізсіз өсуіне жол бермеу және кәсіпкерлердің 15 пайыздық сауда үстемесін сақтауын қадағалау жүргізіліп жатыр. Заңбұзушылықтар анықталса, кәсіпкерлер әкімшілік жауапкершілікке тартылады.

Мәселен, биылғы жылдың басынан бері картоп бағасын негізсіз өсірген 4 кәсіпкерге айыппұл салынды", - делінген хабарламада.

Сондай-ақ сауда нүктелерінің біріндегі сөрелерде картопты бекітілген бағамен – 157 теңге/кг сату арқылы қаладағы бағаны тұрақтандыру жалғасып жатқаны атап өтілді. Басқа дүкендердің сөрелеріндегі бағалар 336 және 385 теңге.

"Жалпы, барлық сауда орнында өнімдер жеткілікті көлемде қолжетімді, ажиотаж бен тапшылық жоқ", - деп сендірді әкімдік.

Мәтіннен қате тапсаңыз, бізге жазыңыз