Dar Team жекпе-жек клубының бас бапкері Эдуард Базров команданың алдағы жоспары туралы айтты. Бұл туралы KAZ.NUR.KZ Sport Plus Qazaqstan арнасының ресми сайтына сілтеме жасап хабарлайды.
"Dar team командасының басты мақсаты – UFC белбеуі. Біздің командамыздың екі өкілі UFC-де өнер көрсетеді. Олар – Шавкат Рахмонов пен Асу Алмабаев. Шавкатқа белбеуді иеленуге бір қадам қалды. Осы жылы тағы бір табан жақындап, келесі жылы белбеуді Қазақстанға әкелетінімізге сенімдімін", - деді Базров.
Айта кетейік, Шавкат Рахмонов октагонға күзде оралатынын мәлімдеген еді. Ал Асу Алмабаев 15 маусымда UFC Fight Night турнирінде америкалық файтер Хосе Джонсонмен жекпе-жекке шығады.
Рахмонов соңғы жекпе-жегін 2023 жылы желтоқсанда Лас-Вегас (АҚШ) қаласында өткізіп, америкалық файтер Стивен Томпсонды мерзімінен бұрын жеңген болатын. Алмабаев соңғы рет биыл 9 наурызда октагонға шығып, Майамиде (АҚШ, Флорида штаты) өткен UFC 299 турнирінде АҚШ өкілі Си Джей Вергараны төрешілердің шешімімен ұтты.
Мақаланың түпнұсқасы: https://kaz.nur.kz/sport/mma/2100389-kelesi-zhyly-ufc-belbeuin-qazaqstanga-alyp-kelemiz-shavkat-rahmonovtyng-bapkeri-tosyn-malimdeme-zhasady/
