"Әл-Наср" футбол клубының ойыншысы Криштиану Роналду Сауд Арабия чемпионатындағы оғаш қылығы үшін жазаланбақ. Бұл туралы KAZ.NUR.KZ Al Riyadhiah басылымының X желісіндегі ресми парақшасына сілтеме жасап хабарлайды.
Криштиану Роналду саудиялық Про-лиганың 21-туры аясында "Әл-Шабабқа" қарсы өткен ойында (3:2) "Месси!" деп айғайлаған жанкүйерлерге оғаш қылық көрсеткен еді.
Al Riyadhiah басылымының жазуынша, тәртіп комитеті португалиялық футболшыны спорттық емес мінез-құлқы үшін екі матчтан шеттетіп, ақшалай айыппұл салуды жоспарлап отыр.
Еске салайық, осыған дейін қарсылас команданың шарфын лақтырып жіберген Роналдудың әрекеті желіде қызу талқыланған еді.
Айта кетейік, Криштиану Роналду Азия Чемпиондар лигасының 1/8 финалында клубтық деңгейдегі 1000-матчын өткізді. Ол "Әл-Наср" сапына 2022 жылдың соңында қосылған еді. 39 жастағы футболшы өткен жылы 54 гол соғып, үздік сұрмерген атанды.
Transfermarkt порталы Криштиану Роналдудың трансферлік нарықтағы құнын 15 миллион еуро деп бағалап отыр.
Мақаланың түпнұсқасы: https://kaz.nur.kz/sport/other-sports/2063181-kristianu-ronaldu-ogas-qylygy-usin-oiynnan-settetilip-aiyppul-toleitin-boldy/
