Алматыдағы жер сілкінісі: Қытайда 7 балдық жер сілкінісі тіркелді

Қырғызстан-Қытай шекарасында 7 балдық жер сілкінісі тіркелді. Жер сілкінісі ұйғыр халқы орналасқан Ушу ауылдық аймағында болған. Бұл туралы The Guardian басылымына сілтеме жасаған KAZ.NUR.KZ хабарлайды.

Басылым жазуынша, Қытай мен Қырғызстан шекарасында 7 балдық күшті жер сілкінісі болған. Бұл ретте жерасты дүмпулері көрші елдерде, оның ішінде Қазақстанда да сезілген.

Қытайдың сейсмикалық орталығының мәліметі бойынша, жер сілкінісі Ушу округінде 23 қаңтарға қараған түні тіркелген. Бірінші жойқын жер сілкінісінен кейін 4,5 балға дейін жеткен тағы бірнеше рет жерасты дүмпуі болған.

Зардап шеккендер мен қаза болғандар туралы ақпарат жоқ.

"Қытайдың өрт сөндіру және құтқару басқармасы әлеуметтік желіде өрт сөндірушілердің жер сілкінісінің ошағына бара жатқаны түсірілген видео жариялады. Weibo қолданушысы жариялаған видеодан қысқы күрте киген тұрғындардың далада тұрғанын, ал CCTV мемлекеттік телеарнасы жариялаған фотодан жарылған қабырғалар мен опырылған бөліктерін көруге болады", – делінген хабарламада.

Қазақстанның оңтүстік-шығысындағы жер сілкіністері

Еске салайық, бүгін түнде Алматыда жер сілкінісі тіркелді. ТЖД ақпаратынша, жер асты дүмпулерінің магнитудасы – 6,7. Алматыда 5 балдық жер сілкінісі тіркелген.

Желіде тұрғындар жер сілкінісінен соң жаппай көшеге шығып жатқаны көрсетілген видеолар тарады.

Кейін Алматы ТЖД бастығы Нұрлан Атығаев жер сілкінісінен зардап шеккендер мен қайтыс болғандар, сондай-ақ ғимараттардың қирауы туралы ақпарат келіп түспегенін хабарлады. Сондай-ақ ол азаматтардан қауіпсіз жерге шығуды сұрады.

Сонымен бірге Алматы ТЖД бастығы Нұрлан Атығаев қалада тағы да жер сілкінісі тіркелгенін хабарлады. Оның сөзінше, зілзала магнитудасы 2-3 болған.

Бұдан бөлек, Атығаев желіде тарап жатқан таңғы сағат бесте жер сілкінісі қайталанатыны туралы хабарды жоққа шығарды.

Ал Алматы полициясы қаладағы тәртіпті қамтамасыз ету бойынша шаралар қабылдап, кептеліс болдырмау мақсатында патрульдік полиция инспекторлары қолмен реттеуге көшті.

Одан бөлек, Алматы әкімдігі қалада жер сілкінісі салдарынан қирау фактілері болды деген ақпарат шындыққа жанаспайтынын мәлімдеді.

ТЖМ сейсмологиялық бақылау және зерттеу ұлттық ғылыми орталығының директоры Дәулет Сәрсенбаев қалада жақын уақытта жойқын жер сілкінісі күтілмейтінін хабарлады. Оның айтуынша, Алматы қаласы мен Алматы облысының тұрғындары сезінген жер сілкіністері афтершок болып табылады. Мұны Орталық Азияның барлық дерлік елі сезінген.

Қалалық ТЖД жер сілкінісіне байланысты 8 727 278 20 83 және 8 727 278 20 84 телефон нөмірлері бойынша жедел желі жұмыс істеп тұрғанын мәлімдеді.

Мегаполис басшысы Ерболат Досаев штабта сағат 00:20-дан бастап Жедел штабтың шұғыл кеңесін өткізгені, онда одан әрі іс-қимыл жоспары талқыланып жатқаны хабарланды.

Қалалық білім басқармасы қала мектептері мен колледждерінде түні бойы халықты қабылдау пункттері жұмыс істеуіне байланысты 23 қаңтарда бірінші ауысымдағы сабақтар болмайтынын хабарлады.

Сейсмологиялық бақылаулар мен зерттеулердің ұлттық ғылыми орталығының базасында комиссия Алматы болжамдық полигонының аумағындағы сейсмикалық жағдайға бағалау жүргізді. Комиссияның қорытындысына сәйкес күшті және жойқын жер сілкінісі күтілмейтіні айтылды.

Сондай-ақ қаңтардың 23-і таңертең Алматы облысында тағы бір жер сілкінісі тіркелген – Алматыда жер сілкінісі 2-3 балл шамасында болғаны сезілді.

Айта кетсек, бастапқыда Алматы қалалық денсаулық сақтау басқармасы бүгін түнде болған жер сілкінісінен зардап шеккендер жоқ екенін, дәрігерлер күшейтілген режимде жұмыс істеп жатқанын жеткізді. Кейін жер сілкінісі салдарынан 8 адам зардап шеккені белгілі болды.