Бишімбаевтың адвокаты сот процесінде 20 құқықбұзушылық анықталғанын мәлімдеді

Бүгін Астанада Қуандық Бишімбаев пен Бақытжан Байжановқа қатысты апелляциялық шағым қаралып жатыр. Алдымен Бишімбаевтың адвокаты Ерлан Ғазымжанов сөз алды, деп хабарлайды KAZ.NUR.KZ.

Ерлан Ғазымжанов судья Құлбаева заңбұзушылыққа алқабилер алқасын құру кезінде-ақ жол бергенін мәлімдеді.

"Судья кімнің сотталушымен шамалас ұлы бар екенін анықтап, төрт кандидатты жеке өзі алып тастады, егер судья тәртіпті бұзбаған болса, осы төрт кандидаттың біреуі негізгі құрамға кіріп, дауыс беруі мүмкін еді. Үкім басқаша болуы мүмкін еді", - деді адвокат.

Оның пікірінше, осы факт сот шешімін бұзуға негіз болып саналады.

Еске салайық, 10 маусымда Астана сотына Бишімбаев пен Байжановтың ісі бойынша апелляциялық шағым түскен болатын. Өтініш берушілер апелляциялық шағымында:

• іс-әрекетінде қылмыс құрамының болмауына байланысты Бақытжан Байжановты ақтауды;
• Қуандық Бишімбаевқа Қылмысық кодекстің 99-бабының 2-бөлігінің 5-тармағы (аса қатыгездікпен кісі өлтіру) бойынша шыққан үкімді Қылмыстық кодекстің 106-бабының 3-бөлігіне (абайсызда жәбiрленушiнiң өліміне әкеп соққан денсаулыққа қасақана ауыр зиян келтіру) өзгертіп, жаза мерзімін азайтуды, сондай-ақ үкімнің күшін жойып, істі жаңадан сот талқылауына жіберуді сұрады.

Жоғарғы соттың қылмыстық істер жөніндегі сот алқасының төрағасы Назгүл Рахметуллина апелляциялық шағымды қарау мерзімі бір ай екенін мәлімдеді.

Қуандық Бишімбаев ісі

Еске салайық, 9 қарашада БАҚ пен Telegram-дағы арналар бұрынғы ұлттық экономика министрі Қуандық Бишімбаев Астанада әйелін ұрып өлтірді деген күдікпен ұсталғанын хабарлады.

Астана қаласы полиция департаменті 9 қарашада елордадағы мейрамхана қонақтарының арасында жанжал шығып, салдарынан бір әйелдің қаза тапқанын растады. Елордалық ПД күдікті қамауға алынып, тергеу амалдары жүргізіліп жатқанын мәлімдеді.

Қуандық Бишімбаевтің ұсталғанын 10 қарашада ішкі істер министрінің орынбасары Серік Сәрсенов растады.

12 қарашада Қуандық Бишімбаев екі айға қамауға алынды. Сонымен бірге оның туыс інісі Бақытжан Байжанов қылмысты жасырды және қылмыс туралы хабарламады деген күдікпен ұсталды.

Қайғылы оқиға жайында президент Қасым-Жомарт Тоқаев пікір білдірді. Ол Нүкенованың өліміне қатысты істі ерекше бақылауда ұстауды тапсырды.

11-12 наурызда Астанада Салтанат Нүкенованы өлтірді деп айыпталған бұрынғы ұлттық экономика министрі Қуандық Бишімбаевтың ісі бойынша алдын ала сот тыңдауы өтті. Сот залына журналистерді кіргізбеді, баспасөз өкілдері сот отырысын көрші бөлмеден теледидар арқылы бақылап отырды.

Алдын ала тыңдаудың бірінші күні прокурор Салтанат Нүкенова қаза болған күні не жағдай болғанын айтты. Бишімбаев тағылған айып түсінікті екенін, бірақ кінәсін мойындамайтынын мәлімдеді.

Сондай-ақ ол істің алқабилердің қатысуымен қаралғанын қалайтынын жеткізді.

Ал оның адвокаты заңбұзушылықтарды жою үшін істі прокурорға қайтаруды сұрады. Судья Айжан Құлбаева Бишімбаевтың адвокаттарының өтінішін қанағаттандырмады.

Дегенмен судья Бишімбаевтың сот отырысын алқабилердің қатысуымен өткізу туралы өтінішін қанағаттандырды.

Осылайша, алқабилер іріктеліп, 27 наурызда Қуандық Бишімбаев пен оның туыс інісіне қатысты басты сот отырысы басталған болатын.

Алайда Бишімбаев аса қатыгездікпен кісі өлтіру бабы бойынша кінәсін мойындамайтынын тағы да мәлімдеді.

Сонымен қатар сот тергеуі кезінде сот-медициналық сарапшы Тахир Халиманазаров сараптама қорытындысын оқып, Салтанаттың қалай көз жұмған болуы мүмкін екенін айтты. Одан бөлек іске қатысты басқа да куәгерлерден жауап алынды.

22 сәуірдегі сот отырысына ресейлік танымал журналист Ксения Собчак келді. Кейін ол сот процесі туралы репортаж жариялады.

29 сәуірде мемлекеттік айыптаушы Бақытжан Байжановтан қылмыс туралы хабарламады деген айыпты алып, тек қылмысты жасырды деген айыпты қалдыру туралы сотқа өтініш берді. Ал 2 мамырда судья Байжановтан қылмыс туралы хабарламады деген айыпты алып тастады.

6 мамырда сотта соңғы сөзін айтқан Қуандық Бишімбаев кінәлі екенін, десе де Салтанат Нүкенованы қасақана өлтірмегенін айтты. Сондай-ақ ол Нүкенованың туыстарынан кешірім сұрады.

Соңғы сөзін айтқан Бақытжан Байжанов та марқұмның жақындарынан кешірім сұрады. Одан бөлек, Байжанов Салтанаттың жылы жүзді, шынайы адам болғанын айтып, кез келген жазаға мойынсұнатынын мәлімдеді.

Сот үкімімен Қуандық Бишімбаев 24 жылға, ал Бақытжан Байжанов 4 жылға бас бостандығынан айырылды.

Кейін Бишімбаев пен Байжанов ісі бойынша апелляциялық шағым сотқа түскені белгілі болды.