Ақтауда апатқа ұшыраған ұшақ бортында болған қырғызстандықтар туралы мәлімет шықты

Ақтауда апатқа ұшыраған ұшақ бортында болған 3 қырғызстандық азамат туралы мәлімет шықты. Олардың үшеуі де апаттан аман қалған, бірақ біреуінің жағдайы ауыр, деп хабарлайды Sputnik Кыргызстан агенттігі.

Қырғызстан Республикасы Төтенше жағдайлар министрлігіне сілтеме жасаған агенттік мәліметінше, ақтауда апатқа ұшыраған ұшақ бортында болған үш қырғызстандық да аман.

Сол елдің Сыртқы істер министрлігінің хабарлауынша, олар Маңғыстау облыстық көпсалалы ауруханасында жатыр.

Олар: 20 жастағы А.Р.Т., 26 жастағы О.Т.М., 36 жастағы Д.Э.Д.

"20 жастағы жолаушының жағдайы ауыр, қалған екеуінің өміріне қауіп төніп тұрған жоқ.

Қазақстандағы Қырғызстан елшілігінің қызметкерлері Қазақстанның құзырлы органдарымен байланыста", - делінген хабарда.

Ақтаудағы ұшақ апаты

Еске салсақ, бүгін, 25 желтоқсанда Бакуден Грозныйға бет алған ұшақ Ақтау маңында апатқа ұшырады.

Маңғыстау облысы баспасөз қызметінің хабарлауынша, 25 желтоқсан күні сағат 10:58-де 1-ші санатты жедел жәрдем шақыру түскен. Оқиға орнына 22 жедел-жәрдем бригадасы жіберілген. Қазақстан Көлік министрлігі алдын ала ақпаратқа сәйкес ұшақ бортында 62 жолаушы мен 5 экипаж мүшесі болғанын хабарлады.

Кейін Төтенше жағдайлар министрлігі Ақтау маңында болған ұшақ апаты туралы нақтыланған деректерді жариялады. Ұшақ бортында 69 адам болған, оның бесеуі – экипаж мүшесі.

Бортта 49 Әзербайжан, 16 РФ, 6 Қазақстан, 3 Қырғызтан азаматы болған. 28 адам ауруханаға жатқызылды, оның ішінде екеуі бала.

Апатқа байланысты Төтенше жағдайлар министрлігі жедел желі іске қосты. Аzerbaijan Airlines (AZAL) әуе компаниясы Telegram-дағы ресми арнасында Баку-Грозный бағытында ұшып бара жатып, Ақтау маңына құлаған ұшақ бортында болған жолаушылар тізімін жария етті.

Сондай-ақ Ақтаудағы ұшақ апатынан аман қалғандардың тізімі және экипаж мүшелерінің тізімі шықты.

Ақтауда жаңажылдық шырша жағу шарасы ұшақ апатына байланысты өтпейтін болды. АZAL әуе компаниясы ұшағының апатқа ұшырау фактісі бойынша Ішкі істер министрлігі Қылмыстық кодексінің 344-бабының 3-бөлігі, яғни екі немесе одан да көп адамның өліміне әкеп соққан әуе көлігінің қозғалысы немесе пайдалану қауіпсіздігі қағидаларын бұзу бойынша қылмыстық іс қозғады.

Жалпы апат орнынан 29 адам облыстың медициналық мекемелеріне жеткізілген. Олардың 27-сі Маңғыстау облыстық ауруханасына түсті.

Денсаулық сақтау министрлігі мәліметінше, 27 адамның 11-інің жағдайы ауыр. Қазіргі уақытта олар жансақтау бөлімінде жатыр.

Сонымен қатар облыстық балалар ауруханасына 11 және 16 жастағы екі бала жеткізілді. Екеуіне де ота жасау жоспарлануда.