"Оған барынша ауыр жаза тағайындалды": Байжановтың адвокаты үкімге не үшін шағымданғанын айтты

Салтанат Нүкенованы өлтіру ісі бойынша сотталған екінші адам Бақытжан Байжановтың адвокаты сот үкіміне шағымдану шешіміне қатысты пікір білдірді. Бұл туралы KAZ.NUR.KZ тілшісі хабарлайды.

"Иә, бүгін біз Қылмыстық-процессуалдық кодекске сәйкес, бір айдың ішінде апелляциялық шағым бердік, - деді Ғазиз Ынтықбаев.

Ол Байжанов тарабының үкіммен келіспейтінін айтты.

"Үкімді талдайтын болсақ, сот кабинетінде 432-бап бойынша 17 үкім шыққаны көрсетілген. Ішіндегі рекордсмені — Бақытжан Оған барынша ауыр жаза тағайындалды. Бас бостандығынан айыру және оған 4 жыл барынша ұзақ мерзім берілді.

Басқа сот үкімдерін қарасаңыз, бұрын сотты болып, бұл қылмысты мас күйінде жасағандар бар. Көпшілігіне бас бостандығын шектеу жазасы берілген. Үшеуі ғана бас бостандығынан айырылды - 2, 3 жыл, өйткені олар бұрын сотты болған.

Бақытжанның бала-шағасы, жұмыс істемейтін әйелі, жақсы мінездемелері ескерілмей, қайталап қылмыс жасағандарға қарағанда ұзақ мерзіммен жаза тағайындалды", - дейді адвокат.

Оның айтуынша, қорғаушы тарап үкімнің күші жойылып, жаңа сот талқылауына жіберілуін талап етеді.

Ынтықбаев Бишімбаевтың апелляциялық шағым түсірген-түсірмегенін білмейтінін айтты.

Айта кетейік, бұл іс бойынша сот кабинете апеляцтялық шағым түскенін хабарлаған едік.

Қуандық Бишімбаев ісі

Еске салайық, 9 қарашада БАҚ пен Telegram-дағы арналар бұрынғы ұлттық экономика министрі Қуандық Бишімбаев Астанада әйелін ұрып өлтірді деген күдікпен ұсталғанын хабарлады.

Астана қаласы полиция департаменті 9 қарашада елордадағы мейрамхана қонақтарының арасында жанжал шығып, салдарынан бір әйелдің қаза тапқанын растады. Елордалық ПД күдікті қамауға алынып, тергеу амалдары жүргізіліп жатқанын мәлімдеді.

Қуандық Бишімбаевтің ұсталғанын 10 қарашада ішкі істер министрінің орынбасары Серік Сәрсенов растады.

12 қарашада Қуандық Бишімбаев екі айға қамауға алынды. Сонымен бірге оның туыс інісі Бақытжан Байжанов қылмысты жасырды және қылмыс туралы хабарламады деген күдікпен ұсталды.

Қайғылы оқиға жайында президент Қасым-Жомарт Тоқаев пікір білдірді. Ол Нүкенованың өліміне қатысты істі ерекше бақылауда ұстауды тапсырды.

11-12 наурызда Астанада Салтанат Нүкенованы өлтірді деп айыпталған бұрынғы ұлттық экономика министрі Қуандық Бишімбаевтың ісі бойынша алдын ала сот тыңдауы өтті. Сот залына журналистерді кіргізбеді, баспасөз өкілдері сот отырысын көрші бөлмеден теледидар арқылы бақылап отырды.

Алдын ала тыңдаудың бірінші күні прокурор Салтанат Нүкенова қаза болған күні не жағдай болғанын айтты. Бишімбаев тағылған айып түсінікті екенін, бірақ кінәсін мойындамайтынын мәлімдеді.

Сондай-ақ ол істің алқабилердің қатысуымен қаралғанын қалайтынын жеткізді.

Ал оның адвокаты заң бұзушылықтарды жою үшін істі прокурорға қайтаруды сұрады. Судья Айжан Құлбаева Бишімбаевтың адвокаттарының өтінішін қанағаттандырмады.

Дегенмен судья Бишімбаевтың сот отырысын алқабилердің қатысуымен өткізу туралы өтінішін қанағаттандырды.

Осылайша, алқабилер іріктеліп, 27 наурызда Қуандық Бишімбаев пен оның туыс інісіне қатысты басты сот отырысы басталған болатын.

Алайда Бишімбаев аса қатыгездікпен кісі өлтіру бабы бойынша кінәсін мойындамайтынын тағы да мәлімдеді.

Сонымен қатар сот тергеуі кезінде сот-медициналық сарапшы Тахир Халиманазаров сараптама қорытындысын оқып, Салтанаттың қалай көз жұмған болуы мүмкін екенін айтты. Одан бөлек іске қатысты басқа да куәгерлерден жауап алынды.

22 сәуірдегі сот отырысына ресейлік танымал журналист Ксения Собчак келді. Кейін ол сот процесі туралы репортаж жариялады.

29 сәуірде мемлекеттік айыптаушы Бақытжан Байжановтан қылмыс туралы хабарламады деген айыпты алып, тек қылмысты жасырды деген айыпты қалдыру туралы сотқа өтініш берді. Ал 2 мамырда судья Байжановтан қылмыс туралы хабарламады деген айыпты алып тастады.

6 мамырда сотта соңғы сөзін айтқан Қуандық Бишімбаев кінәлі екенін, десе де Салтанат Нүкенованы қасақана өлтірмегенін айтты. Сондай-ақ ол Нүкенованың туыстарынан кешірім сұрады.

Соңғы сөзін айтқан Бақытжан Байжанов та марқұмның жақындарынан кешірім сұрады. Одан бөлек, Байжанов Салтанаттың жылы жүзді, шынайы адам болғанын айтып, кез келген жазаға мойынсұнатынын мәлімдеді.

Сот үкімімен Қуандық Бишімбаев 24 жылға, ал Бақытжан Байжанов 4 жылға бас бостандығынан айырылды.